Ҳар бир ота-она яхши мультфильм танлаш қанчалик қийин бўлишини билади. Ҳеч ким бош оғриғини келтириб чиқарадиган анимацион ҳайвоннинг чийилдоқ овозини эшитишни, аҳмоқона ҳазиллар ва қўрқинчли кадрлардан сесканиб тушишни хоҳламайди. Шунинг учун нафақат болаларга, балки катталарга ҳам ёқадиган мультфильмлар тўпламини тақдим этамиз.
“Ботинка кийган чиғаноқ Марсель”
Бу Марсель исмли кичкина гапирувчи чиғаноқ ҳақидаги таъсирли ҳикоя бўлиб, у бувиси Конни ва уй ҳайвони — Алан исмли бир парча жун билан яшайди. Бир куни Марсель яшайдиган квартирани режиссёр Дин ижарага олади. У кичкина чиғаноқ билан танишади ва у ҳақда ҳужжатли фильм суратга олишга қарор қилади. Анимация ва жонли ҳаракатнинг комбинацияси бўлган мазкур мультфильм самимийлиги ва ғайриоддий концепцияси, шунингдек, комедия ва таъсирчан драма ўртасидаги мувозанати учун танқидчилар эътирофига сазовор бўлган.
“Клаус”
Санта Клаус афсонасининг пайдо бўлиши ҳақида ҳикоя қилувчи ажойиб ва таъсирли Рождество тўғрисидаги мультфильм. Ҳикоя бойваччанинг эркатой ўғли Жеспернинг почта академиясида ўқишни барбод қилиши билан бошланади. Жазо сифатида почта хизмати бошлиғи бўлган отаси Жесперни узоқ ва совуқ Смиренсбург шаҳрига юборади, у ерда эса одамлар душманликда яшайди. Йигитнинг вазифаси — йилига 6000 та хат жўнатиб, почта хизматини йўлга қўйиш. Бироқ Жеспер ажойиб ёғоч ўйинчоқлар ясайдиган сокин ва меҳрибон ўтинчи Клаус билан учрашганда ҳаммаси ўзгаради. Мультфильмда таъсирли лаҳзалар кулгили лаҳзалар билан уйғунлашади, анимация эса анъанавий 2D-техникани замонавий визуал эффектлар билан уйғунлаштирган ҳолда ўзига хос услубда амалга оширилади ва ҳақиқий сеҳрли дунёни яратади.
“Уиллоблар оиласи”
Бу Уиллоблар оиласининг тўртта фарзанди ҳақидаги ҳикоя бўлиб, улар ўта худбин ва бефарқ ота-онаси билан яшайди. Жаноб Уиллоб ва Уиллоб хоним фарзандларига мутлақо қизиқмайди ва уларни ҳаётларига тўсиқ деб ҳисоблашади. Болалар — Тим, Жейн ва эгизак Барнабилар бахтли ва аҳил оилани орзу қилишгани боис уларнинг зулмидан қутулиш учун ота-оналарини хавфли саёҳатга жўнатишга қарор қилишади. Ота-оналари саёҳатда бўлган пайтда болалар идеал оила яратишга уриниб, дунёда ўз ўринларини излай бошлайди. Уларга меҳрибон энага ёрдам беради, у болалар ҳаётига илиқлик ва ғамхўрлик олиб киради. Бу ўткир, ўзига хос ва илҳомлантирувчи ҳикоя бўлиб, у болалар ва катталарга чинакам муносабатлар ва ўзаро тушунишнинг аҳамиятини ўргатади.
“Сеҳрли аждар”
Sony Pictures Animation студияси ва Хитой аниматорлари билан ҳамкорликда яратилган мазкур мультфильм эзгулик, ҳазил-мутойиба ва Шарқ фалсафаси билан тўла. Бош қаҳрамон — самимий, аммо Шанхайда яшовчи камбағал талаба Дин. У оиласи билан кўчиб келганида болаликдаги дўсти Ли На билан учрашишни орзу қилади. Бир куни тақдир унга қадимий чойнак туҳфа қилади, ундан Лун — янги хўжайинининг учта истагини бажаришга тайёр қудратли аждарҳо пайдо бўлади. Мультфильм “Аловуддин”нинг классик сюжетини эслатади.
“Ла Манш гигантлари”
Афсонавий дон Кихотнинг авлоди бўлган 11 ёшли Алфонсо Кихот ҳақида ҳикоя. У Испаниянинг Ла Манш шаҳридаги кичик бир шаҳарчада яшайди ва машҳур бобоси каби жасорат кўрсатишни орзу қилади. Дон Кихотнинг содиқ ҳамроҳининг авлоди бўлган дўсти Панза билан бирга у ўз шаҳрини сақлаб қолиш учун курашади.
“Бўрилар ҳақида афсона”
Дўстлик, эркинлик ва инсоннинг табиат билан алоқаси ҳақида ҳикоя қилувчи сеҳрли мультфильм. Воқеалар XVII аср Ирландияда содир бўлади, у ерда табиат ва сеҳр аста-секин одамлар ва уларнинг қаттиқ тартиблари томонидан сиқиб чиқарилади. Бош қаҳрамон — Робин исмли қиз, у отаси билан кичик шаҳарга кўчиб ўтади. Отаси овчи бўлиб ишлайди ва яқин атрофдаги ўрмонда яшовчи бўриларни йўқ қилиш топшириғини олади. Қизиқувчанлик ва саргузаштларга чанқоқ Робин ўрмонни ўрганишга қарор қилади. У ерда у сирли бўрилар қабиласидан бўлган Маб билан учрашади. Қор бўриси бу — табиат билан алоқасини сақлаб қолган ҳолда бўрига айланиши мумкин бўлган одамлардир. Маб ва унинг тўдаси ўрмонни одамлар томонидан йўқ қилинишидан ҳимоя қилади ва Робин аста-секин бўрилар душман эмас, балки ажойиб ва нозик дунёнинг бир қисми эканлигини тушунишни бошлайди. Бу мультфильм табиат билан уйғунликни топиш ва дунёни нафақат инсон кўзи билан, балки бошқа нарсаларни тушунишга тайёр бўлган қалб билан кўриш қанчалик муҳимлиги ҳақида гапиради.
“Оқим”
Табиат, омон қолиш ва дўстлик кучини ифодаловчи мультфильм. Ҳикоя марказида сув босган дунёга тушиб қолган қора мушук туради. Уйи вайрон бўлгач, у кичик қайиқда сафарга чиқади. Йўлда турли ҳайвонларга дуч келади: капибара, лемур, ретривер ит ва ғалати котиб қуш. Улар тамоман бошқа-бошқа бўлсалар-да, қийинчиликларни енгиш учун бир-бирларига ишонишни ва биргаликда ишлашни ўрганишлари лозим. Уларнинг сафари кутилмаган кашфиётлар, хавф-хатарлар ва дўстлик ҳамма нарсадан устун келадиган лаҳзаларга тўла. Ушбу мультфильм сўзсиз бўлиши билан ажралиб туради. “Оқим” нафақат табиат гўзаллиги ва қудратини намойиш этади, балки дунё инқирозга юз тутганда ҳамжиҳатликнинг аҳамиятини ҳам эслатади.
“Орион ва Зулмат”
Дунёдаги деярли барча нарсадан қўрқадиган, лекин ҳаммасидан ҳам қоронғиликдан чўчийдиган Орион исмли бола ҳақидаги таъсирли ҳикоя. Унинг ҳаёти ташвишларга тўла ва у ўзига қўрқинчли туюлган ҳамма нарсадан қочади. Аммо бир куни унинг асосий қўрқуви — Зулмат унинг уйига меҳмонга келганда ҳаммаси ўзгаради. Зулмат қўрқинчли махлуқ эмас, балки ғайриоддий ва меҳрибон мавжудот экан. У Орионга ўзининг қўрқувларини бартараф этиш учун ажойиб саёҳатга чиқишни таклиф қилади. Улар биргаликда сирли ва ғайриоддий жойларга ташриф буюришади, бу ерда бола илгари уни энг кўп қўрқитган нарсаларга дуч келади. Бу мультфильм қўрқувларни қабул қилиш, уларни енгишни ўрганиш ва ҳатто илгари фақат зулмат кўринган жойларда ҳам дунёнинг гўзаллигини кашф этиш қанчалик муҳимлиги ҳақида.
Изоҳ (0)