АҚШ президенти Дональд Трамп Флоридадан Вашингтонга учаётган президент самолётида журналистларга 18 март куни Россия президенти билан Украинадаги урушни тўхтатиш масаласини муҳокама қилишини билдирди.
“Дам олиш кунларида кўп иш қилинди. Биз бу урушга барҳам бера оламизми-йўқми, шуни кўрмоқчимиз. Менимча, бизда яхши имкониятлар бор”, - деди Трамп.
Трамп Путинни АҚШ таклифини қабул қилишга ва ўтган ҳафта Украина томони рози бўлган 30 кунлик ўт очишни тўхтатишга кўндиришга интилмоқда.
“Биз ер ҳақида гаплашамиз. Электр станциялари ҳақида ҳам сўзлашамиз”, -деди Трамп журналистларга ва “баъзи активларни тақсимлаш” аллақачон муҳокама қилинганини қўшимча қилган.
Кремль музокаралар ташкил этилишини тасдиқлаган.
“Ҳа, бу тўғри. Сешанба куни шундай суҳбат ўтказишга тайёрланмоқда”, - деди Путиннинг матбуот котиби Дмитрий Песков.
Журналистлар Песковдан Америка президентининг Путин билан ҳудудлар ва атом электр станцияларини назорат қилиш масаласини муҳокама қилиш режалари ҳақидаги гапларини шарҳлаш ҳамда суҳбатнинг янги тафсилотларини ошкор қилишни сўрашган.
“Биз ҳеч қачон бундай қилмаймиз, ҳеч қачон воқеалардан олдинга ўтиб кетмаймиз. Суҳбат ҳақиқатан ҳам тайёрланмоқда. Лекин бизнинг тушунчамизда, албатта, икки президент ўртасидаги суҳбат олдиндан бирор мазмунли муҳокамага тортилмайди. Шу сабабли биз бундай иш қилмаймиз”, - дея жавоб берган Песков.
Аввалроқ, Дональд Трамп ижтимоий тармоқларда Владимир Путин билан кеча “жуда яхши ва самарали музокаралар” ўтказилгани ҳақида ёзганди. Оқ уй маъмурияти эса буни рад этиб, Владимир Путин билан Дональд Трамп эмас, балки унинг миллий хавфсизлик бўйича маслаҳатчиси Стив Уиткофф суҳбатлашганини билдирганди.
Изоҳ (0)