Исроил Ғазо аҳолиси учун секторнинг шимолий қисмига йўлни очди, деб хабар бермоқда Reuters.
Маълум бўлишича, бу ҲАМАС 2023 йил 7 октябрда қўлга олинган исроиллик асир — Арбел Ягуд ва яна икки кишини 31 январгача озод қилишга ваъда берганидан сўнг содир бўлган.
Оммавий ахборот воситалари ва ижтимоий тармоқларда минглаб фаластинликлар, асосан пиёда, Ғазо секторининг шимолий қисмига йўл олаётгани акс эттирилган лавҳалар пайдо бўлди. Уларнинг кўпчилиги бир йилдан ортиқ вақт олдин Исроил ҳарбий операцияси туфайли ўз уйларини тарк этишга мажбур бўлган эди. Биноларнинг катта қисми, айниқса секторнинг шимолида вайрон бўлгани сабабли, одамлар амалда харобаларга қайтмоқда. Умуман олганда, секторнинг 650 мингга яқин аҳолиси шимолга қайтиши кутилмоқда.
Исроилнинг Ғазо аҳолиси учун секторнинг шимолий қисмига йўл очиши январь ойи ўрталарида воситачилар ёрдамида тузилган вақтинчалик ўт очишни тўхтатиш ва гаровдагиларни озод қилиш тўғрисидаги келишувда назарда тутилган. Бироқ 25 январь куни ҲАМАС гаровга олинган тўрт нафар исроиллик аёл ҳарбий хизматчини озод қилганидан сўнг, Исроил гуруҳ келишув шартларини бузганини, аввал тинч аҳоли вакили бўлган Арбел Ягудни озод қилмаганини эълон қилди. Исроил Ғазо аҳолисининг унинг озод этилиши ташкил қилинмагунча сектор шимолига ўтишига йўл қўймаслигини айтди.
ҲАМАС воситачиларга Ягуднинг тирик эканлигини ва кейинги шанба куни озод этилишини маълум қилди, аммо унинг озод қилинишини эртароқ муддатга кўчирди. Хабар қилинишича, у билан бирга ҳарбий хизматчи Агам Бергер ва яна бир гаровдаги шахс озод қилинади.
Бу жадвалдан ташқари содир бўлади — 1 февраль куни яна учта гаровдаги озод қилинади, деб хабар бермоқда The Times of Israel.
Сўнгги маълумотларга кўра, Ғазода 2023 йил 7 октябрь куни ҲАМАС томонидан ўғирлаб кетилган 90 киши қолмоқда. Улардан бир неча ўнтаси ҳалок бўлгани тахмин қилинмоқда.
Ғазо секторида ўт очишни тўхтатиш тўғрисидаги битимнинг биринчи босқичида ҲАМАС озод қилиши керак бўлган гаровдагилар рўйхатида 33 киши бор эди. Ҳозирги вақтда уларнинг еттитаси озод қилинган. Исроил бунга жавобан жами икки мингга яқин фаластинликни ўз қамоқхоналаридан озод қилмоқда.
Исроил ва ҲАМАС ўртасида ўт очишни тўхтатиш битими кучга кирди
Изоҳ (0)