Исроил мудофаа вазири Исраэл Кац мамлакат армияси АҚШ билан келишилган ҳолда Ливан билан чегарадаги буфер зонада “номаълум муддат” қолишини маълум қилди.
Ливан билан чегарада “буфер зона мавжуд. Биз Қўшма Штатлардан рухсат олдик, уларга харита бердик ва биз у ерда номаълум муддатга қоламиз, деди Кац Исроил маҳаллий ҳокимият раҳбарларининг конференциясида.
Жорий йилнинг 17 февраль куни Ynet портали Исроил армияси ўт очишни тўхтатиш келишуви доирасида Жанубий Ливандан қўшинларини олиб чиқиши, бироқ бешта стратегик позицияда қолиши ҳақида хабар берган эди. Кан радиостанцияси маълумотларига кўра, Исроил армияси Ливан жанубидаги “Ҳизбуллоҳ” тузилмалари фаоллигининг қайта тикланишига йўл қўймаслик учун ушбу бешта позицияда қолмоқда.
2024 йил 27 ноябрда Америка–Франция воситачилигида тузилган ярашув келишуви Ливан армиясини БМТ тинчликпарвар кучлари кўмагида бутун жанубий чегара бўйлаб жойлаштиришни ва “Ҳизбуллоҳ” тузилмаларини Литани дарёси ортига олиб ўтишни назарда тутган.
Шу билан бирга, Исроил 60 кунгача бўлган муддатда ўз қўшинларини Ливан жанубидан олиб чиқиб кетиши керак эди. Жорий йилнинг 27 январь куни Оқ уй Исроил бўлинмаларини Ливан ҳудудидан олиб чиқиш муддатлари бўйича келишувни 18 февралгача узайтириш бўйича келишувга эришилганини маълум қилди.
Изоҳ (0)