Исроил армияси ҲАМАС томонидан топширилган тўртта жасаддан бири гаровга олинган Шири Бибас эмас, балки номаълум шахсга тегишли эканини маълум қилди. Исроил буни ўт очишни тўхтатиш бўйича келишувнинг “қўпол бузилиши” деб атади. Бу ҳақда The Jerusalem Post хабар берди.
ҲАМАС 20 февраль куни ҳалок бўлган 4 нафар гаровдагилар жасадини Исроилга топширди. Улар орасида 33 ёшли Шири Бибас, унинг ўғиллари (2 ёшли Кфир ва 5 ёшли Ариэл) ва 83 ёшли Одед Лифшиц борлиги таъкидланди. Исроил қабул қилинган жасадларни миллий суд-тиббиёт марказига юборди.
Текширувларда жасадлардан бири номаълум ва Шири Бибасга тегишли эмаслиги аниқланди. Болаларнинг ДНК намуналари қайтарилган аёлники билан мос келмаган.
Бу ҲАМАС томонидан ўта шафқатсиз қоидабузарлик бўлиб, келишувга кўра у тўрт нафар ҳалок бўлган гаровга олинганларни қайтаришга мажбур. Биз ҲАМАСни Шири Бибас ва ўғирланганларнинг барчасини қайтаришга чақирамиз, деди Исроил армиясининг араб тилида сўзлашувчи вакили Авичаи Адраи.
Исроил ва ҲАМАС ўртасидаги келишув гаровга олинганларни озод қилиш ва қурбонларнинг жасадларини қатъий равишда олдиндан тасдиқланган рўйхатга мувофиқ қайтаришни назарда тутади.
Кфир ва Ариэлнинг онаси Ширини қайтариш ўрнига, ҲАМАС ҳеч нарсага арзимайдиган юк каби номаълум жасадни қайтарди. Бу янги тубанлик, ёвузлик ва шафқатсизлик бўлиб, бунга тенг келадигани йўқ, деди Исроилнинг БМТдаги доимий вакили Дэнни Данон.
ҲАМАС жасадларни оммавий намойишда топширганди. Бирлашган Миллатлар Ташкилоти бош котиби Антонио Гутерриш буни қаттиқ қоралади.
Изоҳ (0)