Яман шимолида ҳукмронлик қилаётган шиаларнинг “Ансор Аллоҳ” (ҳусийлар) ҳаракати етакчиси Абдул Малик ал-Ҳусий Ғазо сектори ва Ливанда сулҳ тўхтатилган тақдирда Исроилга қарши ҳужумларни қайта бошлаш билан таҳдид қилди.
Биз Фаластин халқини қўллаб-қувватлаш позициямизни қўлни тепки устида ушлаб туриб тасдиқлаймиз ва агар Исроил Ғазога қарши эскалацияга қайтадиган бўлса, биз ҳам у ерда бўламиз, дейди у.
Яқин Шарқдаги можаро авж олгандан сўнг, ҳусийлар Исроил билан алоқадор кемаларга ҳужум қила бошлади, бунинг оқибатида Сувайш канали орқали денгиз ташувлари кескин камайди. Бундан ташқари, ҳусийлар Исроилга ракета ва дронлар билан зарбалар берди. Улар ўз ҳаракатларини фаластинликларга ёрдам бериш билан изоҳлади. АҚШ, Буюк Британия ва Исроил Яманга ракета зарбалари билан жавоб қайтарди.
АҚШ президенти Дональд Трампнинг фаластинликларни Ғазо секторидан чиқариб юбориш ва уни Вашингтон бошқарувидаги халқаро курортга айлантириш режалари ҳақида гапирар экан, ал-Ҳусий бундай таклиф “иррационал ва унга жавоб бериш керак эмаслигини, чунки у Европа ва халқаро миқёсда норозилик уйғотиши”ни таъкидлади.
Ҳусийлар етакчиси, шунингдек, ҳаракат Ливандаги вазиятни кузатиб бораётганини ва маҳаллий аҳоли ҳамда милицияга ёрдам беришда давом этишини айтди.
10 февраль куни ҲАМАС вакили Абу Убайда ҳаракат Исроил келишувга риоя қилмагани учун гаровга олинганларни шанба кунига режалаштирилган озод қилишни кечиктирганини айтди. Ҳуқуқбузарликлар қаторида у ғазоликларнинг сектор шимолига қайтиши кечикаётгани, уларга қарата ўқ узилгани ва Тель-Авивда анклавга гуманитар ёрдам етказиб бериш билан боғлиқ муаммолар юзага келаётганини санаб ўтди.
Сўнгги уч ҳафта давомида биз душман томонидан келишув шартларининг доимий равишда бузилишини кузатдик, дейди у.
Ҳаракат гаровга олинганларни топширишнинг кечиктирилишини огоҳлантирувчи сигнал деб атади ва воситачиларни айирбошлаш ўз вақтида амалга оширилиши учун Тель-Авивга босим ўтказишга чақирди.
Ўз навбатида, АҚШ президенти Дональд Трамп ҲАМАСдан 15 февраль куни тушгача барча гаровга олинганларни озод қилишни талаб қилиб, шарт бажарилмаса “жаҳаннам бошланиши” билан таҳдид қилди.
Исроил ва ҲАМАС ўртасида ўт очишни тўхтатиш келишуви ва асирлар алмашинуви
ҲАМАС ва Исроил ўртасида ўт очишни тўхтатиш ва асирларни алмашиш бўйича келишув 19 январь куни кучга кирди.
Асирлар алмашинувининг дастлабки тўрт босқичида Исроил қамоқхоналаридан 583 нафар фаластинлик маҳбус, шунингдек, Ғазо секторидаги 13 нафар исроиллик ва 5 нафар тайлик маҳбус озод қилинди.
8 февраль куни Исроил армияси уч нафар исроиллик асирнинг озод этилишига жавобан 183 нафар фаластинлик маҳбусни қамоқдан чиқарди. Улардан 18 нафари умрбод, 54 нафари эса узоқ муддатли қамоқ жазосига ҳукм қилинган. Яна 111 нафари 2023 йил 7 октябрда Исроил ҳужумлари бошланганидан кейин Ғазо секторида қўлга олинган фаластинликлардир.
Умуман олганда, ўт очишни тўхтатиш тўғрисидаги келишувни амалга ошириш уч босқичда ўтказилади. 42 кун давом этадиган келишувнинг биринчи босқичи доирасида 1900 дан ортиқ фаластинлик ва 33 нафар исроиллик озод қилиниши кутилмоқда.
Изоҳ (0)