Исроил 2 март куни Ғазо секторига гуманитар ёрдам киришини тўхтатиб қўйди. Бу ҳақда Исроил бош вазири девонхонасига таяниб, Anadolu хабар берди.
Исроил томонига кўра, бунга асирларни алмашиш бўйича келишувнинг биринчи босқичи якунлангани ва ҲАМАС АҚШ президентининг махсус вакили Стив Уиткоффнинг музокараларни давом эттириш бўйича таклифларини қабул қилишдан бош тортгани сабаб бўлган. Ғазога ҳар қандай товарларни етказиб бериш 2 март куни эрталабдан тўхтатилган.
Фаластиннинг ҲАМАС ҳаракати Исроилнинг қарорини кескин қоралаб, буни ҳарбий жиноят ва “ўт очишни тўхтатиш бўйича келишувга жиддий зарба” деб атади.
Нетаньяхунинг (Исроил бош вазири) гуманитар ёрдамни ўтказиб юборишни тўхтатиш қарори шантаж, ҳарбий жиноят ва келишувга жиддий зарба бўлди, дейилади ҲАМАС баёнотида.
ҲАМАС воситачи мамлакатлар ва халқаро ҳамжамиятни “босқинчиларга босим ўтказиш ва Ғазо секторидаги 2 миллиондан ортиқ кишига нисбатан жиноий ва ахлоқсиз амалиётни тўхтатиш чораларини кўришга” чақирди.
Таъкидланишича, Нетаньяхунинг Ғазода ўт очишни тўхтатиш тўғрисидаги келишувни бузган ҳолда АҚШ таклифларини қабул қилгани ҳақидаги баёноти музокараларнинг иккинчи босқичини бошланишидан қочишга очиқ уриниш бўлган.
Исроил ҳукумати АҚШнинг Ғазо секторида рамазон ойи ва яҳудийларнинг Пасха байрами (12-20 апрель) даврида вақтинчалик ўт очишни тўхтатиш таклифини қабул қилганди. Бу ҳақда Исроил бош вазири Биньямин Нетаньяху девонхонаси баёнотида айтилган.
Ҳарбий жиноятчи Нетаньяху ўзининг фашист армиясининг 15 ойдан ортиқ давом этган ҳужумлари билан жойларда ўрната олмаган сиёсий воқеликни зўрлаб ўрнатишга уринмоқда. У ўз ички сиёсий манфаатлари йўлида келишувни бузиб, асирлар ва Ғазо тинч аҳолисининг ҳаёти эвазига янги инқироз яратишга интилмоқда, дейди ҲАМАС.
Изоҳ (0)