Исроил 22 февралга мўлжалланган 600 дан ортиқ фаластинлик маҳбусни қамоқхоналардан озод қилишни кечиктиришга қарор қилди. Бу ҳақда Исроил бош вазири Биньямин Нетаньяху девонхонаси маълум қилди.
Исроил томони ушбу қарор Фаластиннинг ҲАМАС ҳаракати Ғазода гаровга олинган исроилликларни озод қилиш маросимларидан воз кечмагунча кучда бўлишини айтди.
ҲАМАС томонидан бир неча бор содир этилган қоидабузарликлар, жумладан, гаровга олинганларимизнинг шаънини ерга урувчи маросимлар ва улардан тарғибот мақсадларида сурбетларча фойдаланилганлиги сабабли 22 февраль кунига режалаштирилганларни озод қилиш кейинга сурилди. Бу ҳол гаровга олинганларнинг навбатдаги озод қилиниши камситувчи маросимларсиз ўтишига ишонч ҳосил қилингунга қадар давом этади, дейилади баёнотда.
22 февраль куни Ғазо секторида ҲАМАС томонидан гаровга олинганларни топшириш уч марта амалга оширилди. Аввал икки киши, сўнг уч киши, ундан кейин яна бир киши озод қилинди. Шу куннинг ўзидаёқ уларнинг барчаси Халқаро Қизил Хоч қўмитаси ходимлари орқали Ғазодаги Исроил ҳарбийларига топширилди, шундан сўнг улар Исроилга олиб кетилди. Улардан беш нафарининг озод этилиши махсус маросимлар билан кузатилди. Гаровга олинганларга “озодлик сертификатлари” топширилди. Фақатгина мусулмон ас-Сайиднинг топширилиши эълон қилинмай ўтказилди.
Ушбу олти нафар гаровга олинганларнинг озод этилишига жавобан Исроил Ғазо секторида ўт очишни тўхтатиш тўғрисидаги келишувга кўра, кун давомида камида 602 нафар фаластинлик маҳбусни, жумладан умрбод қамоқ жазосига ҳукм қилинган 50 кишини озод қилиши керак эди. Бироқ буни амалга оширмади.
Маҳаллий вақт билан ярим тунгача ҲАМАС фаластинлик маҳбусларни озод қилиш кечикаётгани сабабли Исроилни Ғазода ўт очишни тўхтатиш тўғрисидаги келишувни “қўпол равишда бузганликда” айблади. Ўз навбатида, ҳаракат сиёсий бюроси аъзоси Суҳайл ал-Ҳиндий ҲАМАСга алоқадор Қудс порталига берган изоҳида Исроил томони гўёки 50 кишига нисбатан “озод этилиши керак бўлган маҳбуслар рўйхатига ўзгартиришлар киритгани”ни таъкидлади.
15 январь куни Исроил ва ҲАМАС Ғазода гаровда ушлаб турилганларни озод қилиш ва анклавда ўт очишни тўхтатиш режимини жорий этишга келишиб олган эди. Учта босқични ўз ичига олган келишув 19 январь куни кучга кирди. Биринчи босқич 42 кун давом этади, бу вақт ичида ҲАМАС Исроил қамоқхоналарида сақланаётган фаластинлик маҳбуслар эвазига камида 33 нафар гаровга олинганларни озод қилиши керак.
Изоҳ (0)