Фаластиннинг ҲАМАС ҳаракати исроиллик гаровга олинган аёлнинг жасади алмаштирилгани сабабини аниқлашга ваъда берди.
Исроил маълумотларига кўра, жасад Шири Бибасга тегишли эмас. ҲАМАСга кўра, Исроилнинг Ғазо секторига қилган ҳаво ҳужумидан сўнг вайроналар остидан топилган жасадлар билан “адаштириб юбориш” юз берган бўлиши мумкин.
ҲАМАС воқеа тафсилотларини аниқлаш учун тергов ўтказишни режалаштирмоқда. Ҳаракат ўт очишни тўхтатиш бўйича ўз мажбуриятларига “тўлиқ содиқлигини” таъкидлади.
AFP хабар беришича, ҳаракат баёнотида Нетаньяхунинг таҳдидларини рад этишини билдирган. Аввалроқ Исроил бош вазири “жангарилар келишувни шафқатсизларча ва разилона бузгани учун тўлиқ ҳақ тўлаш”га чақирган эди.
Жорий йилнинг 20 февраль куни ҲАМАС Қизил хочга 33 ёшли Шири Бибас ва унинг ўғиллари (икки ёшли Кфир ва беш ёшли Ариэл) ҳамда Нир-Оз кибуцидан 83 ёшида ўғирлаб кетилган журналист Одед Лифшицнинг жасадларини топширди. Экспертиза натижаларига кўра, Исроил аёлнинг жасади на Шири Бибасга, на бошқа гаровга олинган аёлга тегишли эканлигини маълум қилди.
2023 йил 7 октябрда ҲАМАС ҳужумида Кфир Бибас тўққиз ойлик, акаси Ариэл эса тўрт ёшда бўлган. Уларнинг отаси Ярден Бибас ўша куни ўғирлаб кетилган, бироқ у оила аъзоларидан алоҳида ушлаб турилган ва 2025 йил февралда озод этилган.
ҲАМАСга кўра, икки бола ва она Исроил авиазарбаси оқибатида ҳалок бўлган. Исроил бу талқинни рад этиб, гаровдагилар ўлимининг ҳақиқий сабабини аниқлашга ваъда берди.
Изоҳ (0)