ҲАМАС ҳалок бўлган тўрт нафар гаровдагиларнинг жасадини Исроилга топширди. Бу ҳақда Al Jazeera хабар берди.
33 ёшли Шири Бибас ва унинг ўғиллари (2 ёшли Кфир ва 5 ёшли Ариэл), шунингдек, 83 ёшли Одед Лифшицнинг жасади Қизил хочга берилган. Уларнинг барчаси Исроилнинг Ғазо секторидаги ҳаво ҳужумлари оқибатида ҳалок бўлгани айтилмоқда.
Жасад топширилган жойда — Ғазо сектори жанубидаги Хон Юнус шаҳрида минглаб одамлар тўпланган. Жасадлар солинган тобутларни аллақачон қабул қилиб олган Исроил ҳарбийлари кейинроқ раввин бошчилигида маросимни ўтказади, сўнгра жасадларни Тель Авивдаги “Абу Кабир” миллий суд-тиббиёт марказига олиб боради.
2023 йил 7 октябрь куни ҲАМАС жангчилари уларнинг оиласи уйига бостириб кирганида Кфир Бибас тўққиз ойлик, акаси Ариэл эса тўрт ёшда эди. Уларнинг отаси Ярден Бибас ўша куни ўғирлаб кетилган, аммо у оила аъзоларидан алоҳида ҳибсда сақланган. Эркак февраль ойида ҲАМАС ва Исроил ўртасидаги келишувнинг биринчи босқичи доирасида озод қилинган.
Исроил расмийлари гаровга олинганларнинг ўлими ҳужум билан боғлиқ эмаслигини таъкидламоқда. 20 февраль ҳолатига кўра, ҲАМАС 19 нафар тирик қолган исроиллик гаровга олинганларни озод қилган. 22 февралда олти кишининг озод қилиниши кутилмоқда, 2 мартга қадар эса келишувнинг биринчи босқичи тугагач, яна тўрт кишининг жасади топширилади.
Изоҳ (0)