АҚШ президенти Дональд Трамп Ғазо секторини сотиб олиб, унинг устидан назорат ўрнатиши ва кейин араб давлатлари ёрдамида қайта тиклаши мумкинлигини айтганди. Туркия президенти Ражаб Тоййиб Эрдўғон ва ҲАМАС мазкур режани қоралади.
“Ҳеч ким Фаластин халқини иккинчи Накбани бошидан кечиришга мажбурлай олмайди”, дея таъкидлади Эрдўғон. У Ғазодаги вайронагарчиликлар учун Исроилдан 100 миллиард доллар товон тўлашни талаб қилди.
Ғазодаги вайронагарчиликлар кўлами 100 миллиард долларга баҳоланмоқда. Бунинг учун Исроил ва Нетаньяху ҳукумати жавобгардир. Исроил ҳукумати аввало вайронагарчиликлар учун тўловни амалга ошириши, сўнгра Ғазони қайта тиклаш жараёнини бошлаши керак. Нетаньяху ўз ерларидан кўчира олмаган Ғазо аҳолиси учун жой излаш ўрнига, Ғазога етказган 100 млрд долларлик зарарни қоплаш манбаларини топиши лозим, дея таъкидлади Туркия президенти.
Сиёсатчи “Исроил тортиб олинган уйлар, ерлар ва иш ўринларини уларнинг қонуний эгалари — фаластинликларга қайтариши шарт”лигини таъкидлади. Эрдўғон ислом дунёси мамлакатларини Ғазо ҳудудини қайта тиклашга имкон қадар ҳисса қўшишга чақирди.
Трампнинг Ғазони сотиб олиш ва назорат қилиш режасини ҲАМАС ҳам қоралади. Бу ҳақда ташкилот сиёсий бюроси аъзоси Эззат Эл Рашқ маълум қилди.
Биз Трампнинг Ғазони сотиб олиш ҳақидаги бемаъни баёнотларини кескин қоралаймиз. Бу сўзлар Фаластин ва умуман минтақага нисбатан чуқур билимсизликни акс эттиради. Ғазо унинг халқига тегишли ва фаластинликлар ўз ерларини ташлаб кетмайди. Улар 1948 йилда босиб олинган шаҳар ва қишлоқларга қайтишдан бошқа ҳеч қандай кўчиришга рози бўлмайди, дея таъкидлади у.
Трампнинг Ғазони сотиб олиш баёноти
Ғазони сотиб олиш ва унга эгалик қилишга қарор қилдим. Қайта тиклаш масаласига келсак, биз уни Яқин Шарқдаги бошқа давлатларга топширишимиз мумкин, улар алоҳида қисмларни қайта қуришлари учун ёки бошқалар бизнинг ҳомийлигимиз остида буни амалга ошириши мумкин, деган эди АҚШ президенти.
У ҲАМАСнинг ҳудудга қайтишига йўл қўймаслик учун АҚШ Ғазо секторини ўз назоратида сақлаб туришга мажбурлигини таъкидлаган.
Изоҳ (0)