Ўзбекистоннинг Туркиядаги ва Россиядаги элчихоналари Тошкентда ўзбекистонликлар учун 15 млн сўм маошли иш борлигини эълон қилди.
Эълонга кўра, фуқаролар Янги Ўзбекистон тарихий лойиҳаларидан бири — “Янги Тошкент” қурилишида иштирок этишга таклиф қилинмоқда. Ушбу лойиҳа доирасида хорижда меҳнат қилаётган юртдошлар учун 10 мингга яқин иш ўрни яратилмоқда.
Қурилиш соҳасида тажрибага эга бўлган фуқаролар қуйидаги 38 йўналиш бўйича ишга қабул қилинади:
- бетончи
- сувоқчи
- сантехник
- электрик
- ғишт терувчи
- ҳамда бошқа қурилиш мутахассислари
Иш ҳақи 8-15 миллион сўм миқдорида белгиланиб, барча зарур шароитлар яратилади.
“Ўз юртингизга қайтиб, оила даврасида ишлаш ва муносиб даромад топиш имкониятини қўлдан бой берманг! Қўшимча маълумот олиш ва ишга жойлашиш учун хориждаги юртдошларимиз 0 800 0000 1176 рақамига ва мамлакатимиздаги юртдошларимиз 1176 га мурожаат қилишлари мумкин”, дейилади хабарда.
Маълумот учун, Ўзбекистонда 2018—2023 йилларда аҳоли даромадининг 16 фоизи мигрантлар улушига тўғри келган. Чет элларда ишлаётган юртдошлар ҳар йили Ўзбекистонга ўн икки-ўн беш миллиард доллар жўнатади.
Президентнинг “Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида”ги қарори қабул қилинган.
Қарорга кўра, 2024 йил 1 ноябрдан:
- хорижий иш берувчилар томонидан таклиф қилинаётган иш ўринлари ҳақидаги барча маълумотлар Миграция агентлигининг электрон платформаси, ОАВ ва ижтимоий тармоқларда очиқ эълон қилиб борилади;
- Агентликнинг электрон платформасида фуқароларга ўзининг резюмесини шакллантириш ва жойлаштириш ҳамда эълон қилинган иш ўринлари бўйича танловларда эркин иштирок этиш имконияти яратилади;
- вақтинча меҳнат фаолиятига чиқиб кетаётган фуқароларга Миграция жамғармаси ҳисобидан 10 миллион сўмгача икки йил муддатга микрокредитлар ажратилади;
- фуқароларнинг хорижда ишга жойлашиши ва “ишчи виза”га оид ҳужжатларини расмийлаштириш бўйича бепул консалтинг хизматлари кўрсатилади.
2024 йил 1 декабрдан агентлик томонидан таълим ташкилотларида хорижга ишга кетмоқчи бўлган фуқароларни касб-ҳунар ва чет тилларига ўқитиш бўйича буюртмалар жойлаштириш тартиби жорий этилади.
Шунингдек, хусусий бандлик агентликлари томонидан лицензия олиш учун захира қилинадиган маблағлар миқдори БҲМнинг 8500 бараваридан 4000 бараваригача туширилади.
Изоҳ (0)