“Билиб қўйингки, иш одамни эмас, одам ишни безайди”. Миллионлаб телеэкранларда намойиш этилган машҳур “Бензоколонка маликаси” фильмида шундай жумла бор. Сунъий интеллект, стартаплару инфлюенсерлик замонида ўзининг севимли машғулотини ҳунармандликда топиб, одамларга хизмат қилаётган гулистонлик заргар Абдукарим Набиев ҳам шу қадриятга шерик.
Сабр ва кўп вақт бағишлашни талаб этувчи касб
18 ёшидан бошлаб профессионал шуғулланиб келаётган Абдукарим Набиев бугунгача 50 дан ошиқ шогирд чиқарган. Унинг айтишича, заргар бўлиш бошқа касбларга солиштирганда у даражада қийин иш эмас, аммо ўрганиш вақтида катта сабр талаб қилади.
Болалигидан ўқитувчилари сабрлилиги ва синчковлигини сезиб, мақтаган қаҳрамонимиз мактабда меҳнат дарсини яхши кўргани, арча безатиш ёки уйда таъмир ишларида кўмаклашишдан завқ олганини эслайди.
“Ҳунармандлар оиласида улғайганман. Шунинг учунми, каттароқ синфга ўтганимда бўш вақтимда нақшлар чизиш, турли шох-шабба ёки эски буюмларни йиғиб, улардан санъат асарлари ясаш севимли машғулотимга айланди. Бу мени соҳага тайёрлади. Шунинг учун заргарлик каби касбни танлаб, уни эгаллаш учун болаликдан, 5-6-синфлардан бошлаб қўл меҳнатига, бирор нималар ясашга ўрганиш муҳим”, дейди у.
Унинг фикрича, мактабни битирган ёки катта ёшли одамлар тезроқ натижа кўргиси, тезроқ пул топгиси келади.
“Заргарлик яхши даромад келтирадиган ҳунар бўлса-да, сезиларли иқтисодий фойда бир неча ой ва ҳатто йиллардан кейин келиши мумкин”.
“Ҳунарманд” уюшмасига аъзолик
2006 йилда 21 ёшли Абдукарим Набиев “Ҳунарманд” уюшмасига аъзо бўлади. Уюшманинг Сирдарё вилояти бошқармаси бошлиғи Музаффар Раҳматовнинг сўзларига кўра, турли халқаро фестивал ва танловларда муваффақиятли иштирок этишидан ташқари, Набиев чекка ҳудудлардан келган кам таъминланган оила фарзандларига ўз соҳаси сир-асрорлари беминнат ўргатиб келмоқда.
Уюшма вакили Музаффар Раҳматов ҳикоямиз қаҳрамонининг 2016 йилдан буён қатнашган йигирмага яқин республика ҳамда халқаро миқёсдаги кўргазма, фестивал ва тадбирларни санайди. Бухоро ипак ва зираворлар фестивали, “Ташаббус” кўрик-танловлари, “Олтинқўл ҳунарманд” халқаро кўргазмаси, Тошкент халқаро туризм кўргазмаси, қовун сайллари, Наврўз ва ҳосил байрамлари шуларнинг баъзилари холос.
“Абдукарим Набиев уюшманинг энг фаол аъзоларидан, у ўз устахонасида ҳам, оила ва маҳаллада ҳам, ҳаётнинг бошқа жабҳаларида ҳам энергияга бойлиги билан ҳавас қилишга арзийди”, қўшимча қилади у.
Эътироф
Албатта ҳар қандай ҳунарманд учун энг зўр эътироф бу унинг ижод маҳсуллари қўлма-қўл бўлишидир. Абдукарим Набиев 22 йилдан бери юзлаб зеб-зийнат ихлосмандларига хизмат қилиб келмоқда.
Уни телеканаллар тонгги дастурлари ва кўрсатувларга таклиф қилишади. Фестивал ва танловларда совринлар беришади.
2024 йил Бухорода бўлиб ўтган II халқаро заргарлик ва зардўзлик фестивали, шунингдек, Craft Fair ярмаркасида иштирок этиб, тадбирлар доирасида “Йилнинг энг яхши ҳунарманди” мукофотига лойиқ топилди.
“Бир киши ўзини тўлақонли бахтли ҳис қилиши учун ҳамма нарсам бор деб ўйлайман. Заргарлик ўлмайдиган ҳунар. Ҳозир ҳам заргарларга иш бор, уларга талаб бор. Кейин ҳам бўлади. Кўпроқ ёшлар бу ҳунарни бўлажак касблари сифатида кўриб чиқишлари ва танлашларини истардим”, дейди у.
Эҳтимол, машҳур совет фильмида аввал дикторлик, стюардессалик ва балерина орзуси бўлган бош қаҳрамон қизнинг бензоколонкани гуллатиб, алалоқибат техник соҳадан кетиши давр пропагандасининг бир қисми бўлгандир. Албатта, ҳар ким севган касбини эгаллаши лозим.
Лекин қаҳрамонимиз “ёшлар касб танлаётганда жамият уларга стандарт қилиб белгилаб берган дастурчилику юристлик каби “оқ ёқали” ишлар баробарида ўзларининг ноёб истеъдод ва қизиқишларига мос юзлаб бошқа касбларни ҳам бееътибор қолдирмасин” дейди.
Саидазиз Аъзамов тайёрлади
Изоҳ (0)