O‘zbekistonning Turkiyadagi va Rossiyadagi elchixonalari Toshkentda o‘zbekistonliklar uchun 15 mln so‘m maoshli ish borligini e’lon qildi.
E’longa ko‘ra, fuqarolar Yangi O‘zbekiston tarixiy loyihalaridan biri — “Yangi Toshkent” qurilishida ishtirok etishga taklif qilinmoqda. Ushbu loyiha doirasida xorijda mehnat qilayotgan yurtdoshlar uchun 10 mingga yaqin ish o‘rni yaratilmoqda.
Qurilish sohasida tajribaga ega bo‘lgan fuqarolar quyidagi 38 yo‘nalish bo‘yicha ishga qabul qilinadi:
- betonchi
- suvoqchi
- santexnik
- elektrik
- g‘isht teruvchi
- hamda boshqa qurilish mutaxassislari
Ish haqi 8-15 million so‘m miqdorida belgilanib, barcha zarur sharoitlar yaratiladi.
“O‘z yurtingizga qaytib, oila davrasida ishlash va munosib daromad topish imkoniyatini qo‘ldan boy bermang! Qo‘shimcha ma’lumot olish va ishga joylashish uchun xorijdagi yurtdoshlarimiz 0 800 0000 1176 raqamiga va mamlakatimizdagi yurtdoshlarimiz 1176 ga murojaat qilishlari mumkin”, deyiladi xabarda.
Ma’lumot uchun, O‘zbekistonda 2018—2023-yillarda aholi daromadining 16 foizi migrantlar ulushiga to‘g‘ri kelgan. Chet ellarda ishlayotgan yurtdoshlar har yili O‘zbekistonga o‘n ikki-o‘n besh milliard dollar jo‘natadi.
Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarori qabul qilingan.
Qarorga ko‘ra, 2024-yil 1-noyabrdan:
- xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi;
- Agentlikning elektron platformasida fuqarolarga o‘zining rezyumesini shakllantirish va joylashtirish hamda eʼlon qilingan ish o‘rinlari bo‘yicha tanlovlarda erkin ishtirok etish imkoniyati yaratiladi;
- vaqtincha mehnat faoliyatiga chiqib ketayotgan fuqarolarga Migratsiya jamg‘armasi hisobidan 10 million so‘mgacha ikki yil muddatga mikrokreditlar ajratiladi;
- fuqarolarning xorijda ishga joylashishi va “ishchi viza”ga oid hujjatlarini rasmiylashtirish bo‘yicha bepul konsalting xizmatlari ko‘rsatiladi.
2024-yil 1-dekabrdan agentlik tomonidan taʼlim tashkilotlarida xorijga ishga ketmoqchi bo‘lgan fuqarolarni kasb-hunar va chet tillariga o‘qitish bo‘yicha buyurtmalar joylashtirish tartibi joriy etiladi.
Shuningdek, xususiy bandlik agentliklari tomonidan litsenziya olish uchun zaxira qilinadigan mablag‘lar miqdori BHMning 8500 baravaridan 4000 baravarigacha tushiriladi.
Izoh (0)