Ўзбекистон аҳолиси пулларини кўпроқ нималарга сарфламоқда?

Марказий банк 2025 йил январь ойида ўтказилган аҳолининг истеъмол кайфияти бўйича шарҳини эълон қилди.

Сўров иштирокчиларининг (2700 киши) 66,4 фоизи келгусида даромадлари ошишини кутаётганини билдирган. Даромадлари камайишини маълум қилганлар эса 10,2 фоиз бўлган. Шу билан бирга, даромадлари ўзгармаслигини кутаётганлар 23,2 фоизга тенг.

Респондентларнинг 68 фоизи расмий иш ҳақидан даромад олишини билдирган.

“Стипендия, нафақа, дивиденд ва депозит орқали даромад олувчиларнинг улуши ортган бўлса, тадбиркорлик ва томорқа фаолиятидан даромад топувчилар улуши бир оз камайган”, дейилади шарҳда.

Сўров натижаларига кўра, кафе-ресторан, савдо, ишлаб чиқариш, фан-таълим ва ташиш хизматлари соҳасида ишловчилар келажакда ойликлари кўпроқ ошишини кутмоқда. Ахборот технологиялари ва оммавий ахборот воситалари вакиллари даромадлари камроқ ошиши бўйича кутилмаларини билдирган.

Иштирокчилардан 77 фоизи келгуси 12 ойда харажатлари кўпайишини билдирган. Харажатлари ўзгармаслигини таъкидлаганлар улуши 15,2 фоизни, чиқимлари қисқаришини кутаётганлар 7,8 фоизни ташкил этган.

Марказий банкка кўра, сўровда қатнашган барча даромад гуруҳлари кутилмаларида харажатлар асосан уй-жой, таълим ва автомобиль билан боғлиқ.

Ёш гуруҳлари бўйича асосий харажатлар таркибида ёшлар (30 ёшгача) кўпроқ таълим, уй-жой таъмири, маиший техника ва электрон қурилмаларга маблағ сарфламоқда.

Ўрта ёшдаги респондентлар эса (30-50 ёш) яшаш шароитларини яхшилашга эътибор қаратмоқда. Уларнинг харажатлари асосан уй-жой таъмири, автомобиль хариди, тўй ва оилавий байрамларга йўналтирилган. Шу билан бирга, болалар таълими ва соғлиқни сақлаш харажатлари ҳам ушбу гуруҳ учун муҳим ўрин тутмоқда.

Катта ёшдагилар (50 ёшдан баланд) учун йирик харидлар ҳиссаси камайиб, даволаниш харажатлари ортиб бормоқда. Мазкур гуруҳда харидлар бошқа гуруҳ респондентларга нисбатан тезроқ камайиб бормоқда.

Сўровда 7-10 млн сўм ҳамда 15-20 млн сўм ва ундан юқори даромадга эга респондентлар келгусида харажатлари кўпайиши мумкинлигини таъкидлаган. Ўз навбатида, 5-7 млн сўм даромад олувчилар эса харажат қилиш бўйича кўпроқ эҳтиёткор ёндашувни сақлаб қолмоқда.

Келгуси 12 ойда кредит қарздорлиги миқдорини оширишни режалаштираётган респондентлар улуши бир оз ўсиб, 57 фоизга тенг бўлган.

Жамғармаларининг ошишини кутаётган иштирокчилар 62,3 фоизга етган. Жамғармалари ўзгармаслигини кутаётганлар эса 23,9 фоиз, жамғармалари камайишини кутаётганлар 13,8 фоизни ташкил қилган.