Руминияда мамлакат президентлигига номзод ва бекор қилинган сайловларнинг биринчи босқичи ғолиби Келин Жоржеску қўлга олинди.
Жоржеску яна президентликка номзодини қўймоқчи эди. Тахминан 30 дақиқа олдин уни йўлда тўхтатиб, Бош прокуратурада сўроқ қилиш учун ушлаб қолишган! Демократия қани, демократияни ҳимоя қилиши керак бўлган ҳамкорлар қани?, дейилади унинг Facebookъдаги мулоқот жамоаси хабарида.
Mediafax хабарига кўра, номзод конституциявий тузумга путур етказиш мақсадида фашистик ташкилот тузиш ва сайлов кампаниясини ноқонуний молиялаштириш билан боғлиқ иш доирасида ҳибсга олинган. News.rо манбаларининг маълум қилишича, Жоржеску гумонланувчи сифатида сўроқ қилинмоқда.
Руминияда президентлик сайловлари 24 ноябрь куни бўлиб ўтган эди. Жоржеску биринчи турда 22,95 фоиз овоз тўплаган. Иккинчи босқичда ўнг марказчи “Руминия қутқарув иттифоқи” партияси етакчиси Елена Ласкони 19,18 фоиз натижага эришган. Сўровларга кўра, мамлакат бош вазири, Социал-демократик партия (СДП) вакили Марчел Чолаку 19,15 фоиз овоз билан учинчи ўринни эгаллаган.
Жоржеску тарафдори бўлган “Руминия бирлашуви учун альянс” (AUR) партияси унинг ҳибсга олиниши муносабати билан Бош прокуратура олдида акция ўтказишини маълум қилди.
Romania Journal нашрининг ёзишича, бугун Жоржескунинг ўнлаб сафдошлари ҳам тинтув қилинган. Руминия полицияси “фашистик, ирқчилик ёки ксенофобик характердаги гуруҳни яратиш ёки ташкил этиш билан боғлиқ” иш доирасида тинтув ўтказганини маълум қилди.
Руминия Конституциявий суди Жоржеску сайловолди кампаниясига қарши айбловлар туфайли сайлов натижаларини бекор қилган эди. У TikTok орқали ўз номзодини пул эвазига илгари сурганликда гумон қилинган, бу Россия буюртмаси билан амалга оширилиши мумкинлиги ҳақида тахминлар илгари сурилган. Бироқ, Руминия солиқ хизмати ANAF TikTok кампанияси Руминиянинг Европага хайрихоҳ Миллий Либерал партияси (PNL) томонидан тўланганини аниқлаган.
Янги сайловлар жорий йилнинг 4 май куни, иккинчи тур, агар керак бўлса, 18 май куни бўлиб ўтади.
Изоҳ (0)