Афсонавий боксчи Флойд Мейвезер АҚШ президенти Дональд Трампни “мамлакат тарихидаги энг яхши президент” деб атади, дея хабар бермоқда DailyMail нашри.
Спортчи аввал ҳам Трампни қўллаб-қувватлаган — у 2017 йилда Дональднинг президент лавозимига тайинланиш маросимида қатнашган ва ўша пайтда ҳам унинг тарафдори эканлигини билдирган эди. Бугун эса у Fox Business телеканали билан суҳбатда Трамп ҳақидаги фикрларини яна очиқ айтди.
Илгари ҳам Трамп бизга раҳбар бўлган эди, лекин биз уни қадрламадик. Дональд — ажойиб раҳбар. Менинг назаримда у бизнинг тарихдаги энг яхши президентимиз ҳисобланади, деди Мейвезер.
Америкада кўпчилик бундан норози бўлса-да, Трампнинг ҳокимият тепасига келиши яхши иш бўлди. Сабаби Оқ уйга ким келса ҳам, фуқароларнинг бир қисми доимо норози бўлади. Менимча, раҳбар лавозими учун энг муносиб инсон Трамп, дея қўшимча қилди собиқ спортчи.
Мейвезернинг ушбу фикрлари ижтимоий тармоқларда катта шов-шувга сабаб бўлди. Трамп тарафдорлари боксчининг бундай қўллаб-қувватловини илиқ қабул қилишди.
“Буюк спортчи буюк инсонни тан олади…”, деб ёзди Х (собиқ Twitter) фойдаланувчиларидан бири.
Бошқа бир фойдаланувчи эса “Мейвезер афсона ва у ҳақиқатни очиқ гапирди”, дея Флойдни қўллаб-қувватлади.
Мейвезернинг сўзларига қарши фикр билдирганлар жуда кам бўлди. Асосий танқидий фикрлар шундан иборат бўлдики, Трамп иккинчи марта президент этиб тайинланганига кўп бўлмагани боис уни тарихдаги энг яхши президент деб аташга ҳали эрта.
Маълумот учун, Флойд Мейвезер профессионал фаолияти давомида бир нечта вазн тоифаларида жаҳон чемпиони бўлган ва бокс тарихидаги энг муваффақиятли жангчилардан бири ҳисобланади. У Супер енгил вазн тоифасида WBC жаҳон чемпиони (63 кг), ярим ўрта вазн бўйича (67 кг) WBC, WBA (Супер), IBF бўйича жаҳон чемпиони ҳисобланади. Шунингдек, у ўрта вазннинг иккинчи енгил тоифаси (69,9 кг) WBC ва WBA (Супер) жаҳон чемпиони бўлишни уддалаган. Қолаверса, жангларда кетма-кет 50 марта ғалаба қозониб, мағлубиятсиз серия қайд этган ва ўзига хос рекорд қайд этган.
Флойд Мейвезернинг энг йирик жанглари орасида Мэнни Пакьяо, Сауль “Канело” Алварес, Оскар Де Ла Ҳоя ва Конор Макгрегорга қарши баҳслар бор.
Изоҳ (0)