Самарқанд шаҳрида 19 ёшли қиз ўзини 9-қаватдан ташлаб жонига қасд қилгани ҳақида хабар берилган эди. Воқеа юзасидан қўшимча тафсилотлар айтилди.
Маълум қилинишича, 1-курс талабаси бўлган марҳума ўзини ташлашга уринган уйда амакиси ва бувиси билан бирга яшаган. Ота-онаси эса хорижда экани айтилмоқда. Қизни ушлаб қолишга, қутқаришга ҳаракат қилган йигит ҳам воқеа ҳақида айтиб берди.
“Дод-вой қилганини кўриб қолдим. Йиқиламан, деб илиниб турган экан. Қутқаришга ҳаракат қилдим, ушлаб олдим. Лекин хоҳламади қутқаришимизни, силкинаверди. Ўзини ташлаб юборди”, дейди йигит.
Ҳозирда марҳуманинг барча оила аъзолари терговга жалб қилинган. Онаси марҳума бир қўнғироқдан сўнг бирданига ўзини ташлаб юборганини билдирган.
Ҳодиса жойи тергов тезкор гуруҳи томонидан кўздан кечирилиб, С.М.нинг ўлими сабабини аниқлаш мақсадида суд-тиббий экспертизаси тайинланган. Қизга тегишли бўлган уяли телефон аппарати олиб қўйилган ва иш учун аҳамиятли маълумотлар мавжудлигига аниқлик киритиш учун Киберхавфсизлик маркази ДУК томонидан компьютер техникавий экспертизаси тайинланган.
Ҳозирда мазкур ҳолат юзасидан Самарқанд шаҳар прокуратураси томонидан терговга қадар текширув ҳаракатлари олиб борилмоқда.
Марҳума Самарқанд шаҳрида жойлашган ISFT’да 1-босқич талабаси бўлган. У ҳали турмуш қурмаган.
Бундан аввал 2025 йил январида Қўқондаги талабалар турар жойида талаба қиз ўз жонига қасд қилгани ҳақида хабар берилган эди. Прокуратура суриштирув натижаларига кўра, мазкур ҳолат шахсий муаммолар сабабли содир бўлгани аниқланган ва жиноят иши қўзғатиш рад этилган.
Изоҳ (0)