Livanning janubiy hududlarini tark etayotgan Isroil armiyasi Livan hududidagi beshta pozitsiyada o‘z o‘rnini saqlab qoladi. Bu haqda Isroil mudofaa vaziri Israel Kats ma’lum qildi.
Bugundan boshlab Isroil mudofaa kuchlari mamlakat shimolidagi aholi punktlarini himoya qilish uchun chegara chizig‘i bo‘ylab beshta nazorat nuqtasida Livandagi bufer zonada qoladi, deb yozdi u X’dagi sahifasida.
Katsning ta’kidlashicha, Isroil armiyasi “Hizbulloh”ga qarshi harakatlarni to‘liq davom ettiradi.
2023-yilning 7-oktyabrdagi holatga qaytishga yo‘l qo‘ymaymiz, deya qo‘shimcha qildi vazir.
Joriy yilning 17-fevral kuni Ynet portali Isroil mudofaa kuchlari o‘t ochishni to‘xtatish kelishuvi doirasida Janubiy Livandan qo‘shinlarni keyingi 24 soat ichida olib chiqib ketishi, biroq beshta strategik pozitsiyada qolishi haqida xabar berdi. Kan radiostansiyasi ma’lumotlariga ko‘ra, Isroil armiyasi Livan janubidagi “Hizbulloh” tuzilmalari faolligining qayta tiklanishiga yo‘l qo‘ymaslik uchun 18-fevraldan keyin ushbu beshta pozitsiyada “noma’lum muddatga” qolishni davom ettiradi.
2024-yil 27-noyabrda Amerika–Fransiya vositachiligi natijasida tuzilgan yarashuv kelishuvi Livan armiyasini BMT tinchlikparvar kuchlari ko‘magida butun janubiy chegara bo‘ylab joylashtirishni va “Hizbulloh” tuzilmalarini Litani daryosi ortiga olib o‘tishni nazarda tutadi.
Shu bilan birga, Isroil 60 kungacha bo‘lgan muddatda o‘z qo‘shinlarini Livan janubidan olib chiqib ketishi kerak edi. 27-yanvar kuni Oq uy Isroil bo‘linmalarini Livan hududidan olib chiqish va o‘t ochishni to‘xtatish muddatlari bo‘yicha kelishuvni 18-fevralgacha uzaytirish bo‘yicha kelishuvga erishilganini ma’lum qildi.
Izoh (0)