Исроил АҚШ билан тўлиқ мувофиқликда жанубий Ливандан қўшинларни босқичма-босқич олиб чиқишни давом эттиради. Бу ҳақда жума куни Биньямин Нетаньяху канселярияси хабар берди.
Гарчи ўт очишни тўхтатиш тўғрисидаги битимда кўзда тутилган 60 кунлик муддат ўтган бўлса-да, Исроил Ливан томонидан шартлар ҳали тўлиқ бажарилмаганини даъво қилмоқда.
Ливандаги ўт очишни тўхтатиш тўғрисидаги келишувда Исроил армиясининг режали равишда чиқиб кетиши 60 кун ичида якунланиши белгиланган эди. Ушбу банд чиқиб кетиш жараёни 60 кундан кейин ҳам давом этиши мумкинлигини тушунган ҳолда ишлаб чиқилган, дейилади хабарда.
Канселяриянинг таъкидлашича, Исроил кучларини олиб чиқиш жараёни Ливан армиясининг мамлакат жанубида жойлашиши ва “Ҳизбуллоҳ” кучлари ва инфратузилмасини Литани дарёсининг шимолига суриб, келишувга тўлиқ ва самарали риоя этилишини таъминлаши билан боғлиқ.
Ливан томонидан ўт очишни тўхтатиш келишуви ҳали тўлиқ бажарилмаганлиги сабабли, босқичма-босқич чиқиш жараёни Қўшма Штатлар билан тўлиқ мувофиқликда давом эттирилади, дея аниқлик киритди бош вазир идораси.
Таъкидланишича, Исроил мамлакат шимолида жойлашган аҳоли пунктлари ва фуқароларини хавф остига қўймайди, “шимолдаги ҳарбий ҳаракатларнинг асосий мақсади эса аҳолини ўз уйларига хавфсиз қайтариш тўлиқ амалга оширилишини қатъий талаб қилади”.
2024 йил 27 ноябрга ўтар кечаси Исроил ва Ливан ўртасида деярли 14 ойлик узлуксиз кескинлик ортишидан сўнг Америка томонидан таклиф этилган келишув режасига мувофиқ ўт очишни тўхтатиш тартиби кучга кирди. Битимни тасдиқлашдан олдин Нетаньяху миллатга мурожаат қилиб, шимолий фронтда ўт очишни тўхтатиш зарурлигини тушунтирди ва “Ҳизбуллоҳ” томонидан сулҳ бузилган тақдирда Исроил жавоб қайтариб, ҳарбий ҳаракатларни қайта бошлашини таъкидлади.
АҚШ томонидан таклиф қилинган келишув режасига кўра, 60 кун ичида Ливан армияси мамлакат жанубидаги ҳудудларни эгаллаши, “Ҳизбуллоҳ” кучлари ва инфратузилмаси эса Исроил чегарасидан 20-30 километр масофада жойлашган Литани дарёсининг шимолий қисмига ўтказилиши керак.
Жорий йил бошида Исроил “Ҳизбуллоҳ” ҳаракати билан келишилган 60 кунлик ўт очишни тўхтатиш режимини узайтиришга уринаётгани ҳақида хабар берилганди.
“60 кун муддати 26 январда, яъни АҚШнинг сайланган президенти Дональд Трамп ўз лавозимига киришганидан олти кун ўтгач тугаса-да, Байден маъмурияти вакиллари муаммоларни ҳал қилишга ва кейинги икки ҳафта давомида ўт очишни тўхтатиш режими бузилишининг олдини олишга ҳаракат қилмоқда”.
Нашр манбасига кўра, гап тинчлик келишувини яна 30 кунга узайтириш ҳақида кетмоқда. The Jerusalem Post’нинг аниқлик киритишича, Исроил бош вазири Биньямин Нетаньяху келгусидаги ҳаракатларни белгилаш мақсадида ўзининг хавфсизлик масалалари бўйича маслаҳатчилари билан йиғилиш ўтказган.
Изоҳ (0)