Исроил АҚШ ёрдамида ноябрь ойи охирида Ливаннинг “Ҳизбуллоҳ” ҳаракати билан келишилган 60 кунлик ўт очишни тўхтатиш режимини узайтиришга уринмоқда. Бу ҳақда Исроил оммавий ахборот воситалари хабар бермоқда.
The Jerusalem Post нашри 5 Исроил ҳукумати вакилидан олинган маълумотга таяниб шундай ёзади:
“60 кун муддати 26 январда, яъни АҚШнинг сайланган президенти Дональд Трамп ўз лавозимига киришганидан олти кун ўтгач тугаса-да, Байден маъмурияти вакиллари муаммоларни ҳал қилишга ва кейинги икки ҳафта давомида ўт очишни тўхтатиш режими бузилишининг олдини олишга ҳаракат қилмоқда”.
Нашр манбасига кўра, гап тинчлик келишувини яна 30 кунга узайтириш ҳақида кетмоқда. The Jerusalem Postънинг аниқлик киритишича, Исроил бош вазири Биньямин Нетаньяху келгусидаги ҳаракатларни белгилаш мақсадида ўзининг хавфсизлик масалалари бўйича маслаҳатчилари билан йиғилиш ўтказган.
Хабарда айтилишича, америкалик воситачи Амос Хохштейн Ливанда жорий йилнинг 6 январь куни “Ливан сиёсий ва ҳарбий етакчилари” билан музокаралар ўтказишни режалаштирмоқда. Учрашувга Хохштейн билан бирга АҚШ Марказий қўмондонлигидан генерал майор Жаспер Жефферс бориши кутилмоқда.
Исроилнинг The Times of Israel нашрининг хабар беришича, Исроил мудофаа вазири Исроил Кац “Ҳизбуллоҳ” сулҳ битимига риоя қилмагани учун унинг ҳукумати “мажбуран ҳаракат қилишишига” тўғри келиши ҳақида огоҳлантирган. Хусусан, унинг сўзларига кўра, жангарилар ҳали ҳам Жанубий Ливандан олиб чиқилмаган, Ливан армияси ҳали Исроил билан чегарадош зонадаги барча қурол-яроғ ва террорчилик инфратузилмасини йўқ қилмаган.
Яқин Шарқдаги вазият 2023 йил 7 октябрда Фаластиннинг ҲАМАС ҳаракати Исроилга ҳужум уюштирганидан сўнг кескинлашди.
Бунга жавобан Исроил ҲАМАСга қарши уруш эълон қилди. Қуруқликдаги операция ва Ғазони бомбардимон қилиш пайтида 45,3 мингдан ортиқ фаластинлик ҳалок бўлган.
Ушбу жангларда “Ҳизбуллоҳ” ҲАМАСни қўллаб-қувватламоқда. Сулҳга қадар “Ҳизбуллоҳ” мунтазам равишда Исроилни Ливан томонидан ўққа тутган. Исроил армияси ҳам Ливан жанубида унга қарши ҳарбий операция ўтказган.
Изоҳ (0)