Исроил ҳукумати Ливанда ва бошқа ҳудудларда қўлга киритилган Россияда ишлаб чиқарилган қуролларни Украинага топшириши мумкин. Бу ҳақда Deutsche Welle хабар берди.
Украинанинг Исроилдаги элчиси Евгений Корнийчук Исроил ташқи ишлар вазири ўринбосари Шаррен Ҳаскел билан буни муҳокама қилган.
“Ушбу ташаббус ҳар икки мамлакат дуч келаётган умумий таҳдидларни тан олишда муҳим қадамдир. Украина томони бу масала ижобий ҳал этилишига умид билдирди”, дейилади дипломатик ваколатхона хабарида.
Бундан ташқари, учрашувда “икки давлат учун долзарб умумий муаммолар, хусусан, Украина ва Исроил миллий хавфсизлигига таҳдид солаётган Эрон ва Россия ҳарбий ҳамкорлиги”га эътибор қаратилган.
“Кун тартибидан олий ва юқори даражадаги иқтисодий, консуллик ҳамда гуманитар соҳалардаги икки томонлама ҳамкорликни фаоллаштириш масалалари ҳам ўрин олган”, дейилади Украина элчихонаси хабарида.
Нетаньяху: Исроил армияси “Ҳизбуллоҳ”да Россия қуроллари борлигини аниқлади
Исроил бош вазири Биньямин Нетаньяху 2024 йил ҳарбийлар Ливандаги “Ҳизбуллоҳ” жангчиларининг базаларини текшириш пайтида Россиянинг “энг замонавий” қуролларини топганини айтганди.
Нетаньяху таъкидлашича, БМТнинг 2006 йилги резолюциясига кўра, Исроил ва Ливан чегараси яқинидан оқиб ўтувчи Летани дарёсининг жанубида фақат Ливан армиясигагина қурол сақлашга рухсат берилган.
Шундай бўлса-да, “Ҳизбуллоҳ” бу ҳудудда юзлаб туннел ва яширин жойларни қазиган, у ерда яқинда бир нечта замонавий рус қуролларини топдик, деган Исроил бош вазири.
Аввалроқ шунга ўхшаш маълумот The Washington Post газетасида эълон қилинганди. Нашр Исроил расмийларига таяниб, Ливан жанубида армиянинг операцияси давомида Россия ва Хитойнинг танкка қарши қуроллари топилгани ҳақида хабар берганди.
Изоҳ (0)