Ливанда 12 маротаба муваффақиятсиз сайловлардан сўнг президент тайинланди

Ливан парламенти иккинчи турдаги сайловда мамлакат қуролли кучлари бош қўмондони Жозеф Аунни президентлик лавозимига сайлади, деб хабар бермоқда CNN.

2022 йил октябрь ойида Ливаннинг собиқ президенти Мишел Ауннинг ваколати тугаганидан сўнг мамлакатдаги президентлик лавозими икки йилдан ортиқ вақт мобайнида бўш қолган эди. Бугунги кунгача Ливаннинг янги президентини сайлашга 12 марта муваффақиятсиз уринишлар бўлиб ўтган.

Овоз беришнинг биринчи босқичи жорий йилнинг 9 январь куни эрталаб ўтказилган, аммо Жозеф Аун ғалаба учун зарур бўлган 128 овоздан 86 тасини тўплай олмаган. Иккинчи турда эса у 99 та овозни қўлга киритишга муваффақ бўлган.

CNN қайд этишича, Аунни АҚШ ва Саудия Арабистони қўллаб-қувватлайди.

Овоз бериш натижаси Исроил билан урушдан кейин “Ҳизбуллоҳ” таъсирининг заифлашганини кўрсатди, деб ёзади Reuters.

Агентликнинг қўшимча қилишича, Ауннинг сайланиши Саудия Арабистони таъсирининг мамлакатда қайта тикланиши ва Эрон таъсирининг заифлашишидан далолатдир. Bloomberg нашри ҳам Ауннинг ғалабаси Эрон таъсирининг пасайишини англатиши ҳақида ёзган.

Ауннинг иккинчи турдаги ғалабаси уни “Ҳизбуллоҳ” парламенти аъзолари қўллаб-қувватлагандан сўнг юзага келди. Биринчи турда улар овоз беришда бетараф қолишган эди.

Ливан сиёсий доираларидаги манбаларга кўра, овоз бериш арафасида Ғарб ва бир қанча араб давлатлари вакиллари Ауннинг сайланишига кўмаклашиш мақсадида Ливан расмийлари билан алоқаларни фаоллаштирган. BBC’га кўра, 8 январь куни Франция ва Саудия Арабистони элчилари Ливан сиёсатчилари гуруҳи билан учрашган.

60 ёшли Аун Ливан армиясини 2017 йил март ойидан бери бошқарган ва 2024 йил январь ойида истеъфога чиқиши керак эди, аммо унинг ваколатлари “Ҳизбуллоҳ” ва Исроил ўртасидаги уруш туфайли икки марта узайтирилган.

Associated Press таҳлилчиларига кўра, Аун тайинлаган Ливаннинг янги ҳукумати жиддий муаммоларга дуч келиши кутилмоқда, чунки мамлакат бир неча йиллардан бери иқтисодий инқироз ҳолатида. Мамлакат раҳбарлари 2022 йилда Халқаро валюта жамғармаси билан молиявий ёрдам пакети бўйича дастлабки келишувга эришишган, аммо ХВЖ билан битим тузиш учун зарур бўлган ислоҳотларнинг оз миқдорини амалга оширишга муваффақ бўлган.