Ливаннинг жанубий ҳудудларини тарк этаётган Исроил армияси Ливан ҳудудидаги бешта позицияда ўз ўрнини сақлаб қолади. Бу ҳақда Исроил мудофаа вазири Исраэл Кац маълум қилди.
Бугундан бошлаб Исроил мудофаа кучлари мамлакат шимолидаги аҳоли пунктларини ҳимоя қилиш учун чегара чизиғи бўйлаб бешта назорат нуқтасида Ливандаги буфер зонада қолади, деб ёзди у Хъдаги саҳифасида.
Кацнинг таъкидлашича, Исроил армияси “Ҳизбуллоҳ”га қарши ҳаракатларни тўлиқ давом эттиради.
2023 йилнинг 7 октябрдаги ҳолатга қайтишга йўл қўймаймиз, дея қўшимча қилди вазир.
Жорий йилнинг 17 февраль куни Ynet портали Исроил мудофаа кучлари ўт очишни тўхтатиш келишуви доирасида Жанубий Ливандан қўшинларни кейинги 24 соат ичида олиб чиқиб кетиши, бироқ бешта стратегик позицияда қолиши ҳақида хабар берди. Кан радиостанцияси маълумотларига кўра, Исроил армияси Ливан жанубидаги “Ҳизбуллоҳ” тузилмалари фаоллигининг қайта тикланишига йўл қўймаслик учун 18 февралдан кейин ушбу бешта позицияда “номаълум муддатга” қолишни давом эттиради.
2024 йил 27 ноябрда Америка–Франция воситачилиги натижасида тузилган ярашув келишуви Ливан армиясини БМТ тинчликпарвар кучлари кўмагида бутун жанубий чегара бўйлаб жойлаштиришни ва “Ҳизбуллоҳ” тузилмаларини Литани дарёси ортига олиб ўтишни назарда тутади.
Шу билан бирга, Исроил 60 кунгача бўлган муддатда ўз қўшинларини Ливан жанубидан олиб чиқиб кетиши керак эди. 27 январь куни Оқ уй Исроил бўлинмаларини Ливан ҳудудидан олиб чиқиш ва ўт очишни тўхтатиш муддатлари бўйича келишувни 18 февралгача узайтириш бўйича келишувга эришилганини маълум қилди.
Изоҳ (0)