АҚШ мудофаа вазири Пит Хегсет Украинага ядровий қурол берилиши мумкинлигини маълум қилди. Бу ҳақда у Breitbart News билан суҳбатда маълум қилди.
Хегсетнинг сўзларига кўра, бундай қуролни бериш АҚШ президенти Дональд Трампнинг қарорига боғлиқ.
Бу менинг вазифам эмас. Бу президентнинг иши. У раҳбар, музокара олиб бориш ва келишувлар тузиш устаси, деган Пентагон раҳбари.
У вазифаси тинчлик келишуви эҳтимолини ошириши учун маълум шартларни белгилашга кўмаклашиш эканини қўшимча қилди.
Украина президенти Владимир Зеленский тинчлик келишуви доирасида Россиянинг келажакдаги босқинидан ҳимояланиш учун Украинага НАТО аъзолиги ёки ядровий қурол берилиши лозимлигини айтганди.
Бизга ядро қуролларини қайтаринг ва Россияни тўхтата оладиган миқдорда ракеталар беринг, деган у британиялик телебошловчи Пирс Морган билан интервьюда.
Пентагон раҳбари бунга жавобан, Украина тегишли баёнотни “қизил чизиқлар"дан келиб чиқиб эмас, балки “реал ҳолат”ни ҳисобга олиб бериш кераклигини айтган.
Биз ҳозирги вазиятни ҳисобга олсак, НАТОга аъзо бўлиш эҳтимоли паст. Агар музокаралар йўли билан тинчликка эришмоқчи бўлсак, агар сиз (Украина) ўт очишни тўхтатишни ва узоқ муддатли тинчлик учун имкониятларни хоҳласангиз, ҳозирги вақтда бу режаларда йўқ. 2014 йилги чегараларга қайтиш ҳам ҳозир режаларда кўзда тутилмаган, деди Хегсет.
АҚШнинг янги мудофаа вазири Пит Хегсет Брюсселда бўлиб ўтган Рамштайн форматидаги йиғилишда сўзга чиқиб, Украинанинг 1991 йилги чегараларини қайтариш реал мақсад эмаслигини таъкидлаган. У Украинанинг НАТОга кириши урушни тинч йўл билан ҳал қилишга ёрдам бермаслигини айтган. Трамп эса урушни дипломатик йўл билан якунламоқчи эканини таъкидлаган.
Хегсет, шунингдек, АҚШ ҳар қандай ҳолатда ҳам Украинага ўз қўшинларини юбормаслигини маълум қилган.
Айни пайтда Эстония халқаро ҳамкорлар билан биргаликда урушдан кейинги тинчликпарварлик миссияси доирасида ўз ҳарбийларини Украинага юборишга тайёр эканини билдирган.
Изоҳ (0)