Покистонда 21 йил ноқонуний яшаган аёл Ўзбекистонга қайтарилди

Покистонда 21 йил ноқонуний яшаган аёл Ўзбекистон элчихонаси дипломатлари кўмагида ватанга қайтарилди. Бу ҳақда “Дунё” ахборот агентлиги хабар берди.

Элчихона маълумотларига кўра, шу йил февраль ойида С.Ж. Ўзбекистонга қайтишда ёрдам сўраб дипломатик ваколатхонага мурожаат қилган. Суҳбат давомида аниқланишича, у 2005 йилдан буён Покистон ҳудудида визасиз, ноқонуний яшаб келган ва оғир ижтимоий аҳволга тушиб қолган.

Аёлнинг сўзларига кўра, у 2005 йилда Покистон фуқароси билан турмуш қуриш мақсадида ушбу мамлакатга келган. Шу йилнинг ўзида турмуш ўртоғи йўл-транспорт ҳодисасига учраб, ногирон бўлиб қолган. Шундан буён у турмуш ўртоғини парваришлаб келган. Ҳозирги кунда турмуш ўртоғининг саломатлиги нисбатан яхшиланган бўлса-да, ногиронлик ҳолати қисман сақланиб қолган. Шунингдек, оиланинг ижтимоий ва молиявий аҳволи ҳамон оғирлигича қолмоқда.

Ўрганишлар давомида аёлнинг ҳақиқатда ҳам молиявий имкониятлари чеклангани, у фақат кундалик рўзғор харажатларини қоплаш имкониятига эга экани маълум бўлди.

Шу муносабат билан элчихона унинг шахси ва фуқаролигини тасдиқлади. Шундан сўнг Ўзбекистонга қайтиш учун сертификат расмийлаштирилди. Покистон Ички ишлар вазирлиги мутасаддилари билан олиб борилган музокаралар натижасида унинг 21 йил давомида визасиз ноқонуний яшагани учун белгиланган 8400 АҚШ доллари миқдоридаги жарима бекор қилинди ва унга мамлакатни тарк этиш учун рухсат олинди.

Бундан ташқари, дипломатик миссия кўмагида С.Ж. учун Ўзбекистонга авиачипта сотиб олиниб, 2 май куни Uzbekistan Airways’нинг Исломобод—Тошкент рейси бўйича ватанга қайтарилди.

Бундан бир неча кун аввал Сербияда моддий қийинчиликка дуч келган ўзбекистонлик эркак ватанга қайтарилганди. Венгрияда иш берувчи томонидан зарур ҳужжатлар расмийлаштирилмагани оқибатида ҳуқуқий ва молиявий қийинчиликларга дуч келган эркак ҳам Ўзбекистонга қайтарилди.