Статистика агентлиги томонидан Ўзбекистоннинг ташқи савдо статистикаси эълон қилинди.
Маълум қилинишича, 2025 йил январь ойида республиканинг ташқи савдо айланмаси 4,5 млрд АҚШ долларига етди ва 2024 йилнинг январь ойига нисбатан 297,2 млн АҚШ долларига ёки 7,5 фоизга кўпайди.
Ташқи савдо айланмасида экспорт ҳажми 1 309,8 млн АҚШ долларига (2024- йилнинг январь ойига нисбатан 14,1 фоизга кўпайди) ва импорт ҳажми 3 199,5 млн АҚШ долларига (4,4 фоизга кўпайди) етди.
Қозоғистон Ўзбекистоннинг энг йирик ташқи иқтисодий ҳамкорларидан бирига айланди (Хитой ва Россиядан кейин). Бунга сабаб қуйидагилар бўлиши мумкин: умумий чегаранинг мавжудлиги, МДҲнинг эркин савдо ҳудудида савдо қилиши ҳамда сўнгги пайтларда ўзаро иқтисодий алоқаларнинг кескин эркинлаштирилиши.
Ўзбекистон жаҳоннинг 154 мамлакати билан савдо алоқаларини амалга ошириб келмоқда. Ташқи савдо алоқасининг нисбатан салмоқли ҳиссаси Хитойда (22,1 фоиз), Россияда (17,7 фоиз), Қозоғистонда (7,0 фоиз), Туркияда (4,7 фоиз) ва Корея Республикасида (3,8 фоиз) қайд этилган.
Республика ташқи савдо айланмаси таркибида энг юқори улушни Тошкент шаҳри 41,7 фоиз улуш билан 1 881,4 млн АҚШ долларини, энг қуйи улушни эса Сирдарё вилояти 1,2 фоиз улуш билан 52,1 млн АҚШ долларини ташкил этди.
2025 йил январь ойида ташқи савдо айланмасида МДҲ давлатларининг улуши 36,5 фоизни ташкил этиб, ташқи савдо айланмасидаги улуши 2024 йилнинг мос даврига нисбатан 2,4 фоизга кўпайди. Ўзбекистон билан савдо қилаётган мамлакатлар иқтисодиёти ўсиши мазкур мамлакатлар истеъмолчилари томонидан республика экспортига бўлган талабнинг ошишига олиб келиши мумкин.
Ўтган йили мамлакат иқтисодий ўсиши прогноздаги кўрсаткичдан юқори даражада шаклланди.
2024 йилда Ўзбекистон ялпи ички маҳсулоти 1,45 квадриллион сўмдан ошди. Бу миқдор йил давомида Марказий банк эълон қилган доллар курсларининг ўртача миқдоридан келиб чиқилса, тахминан 115 млрд долларга тенг бўлади.
Статистика агентлиги маълумотларига кўра, 2024 йил якунида Ўзбекистон аҳолиси сони 37 миллион 543 минг нафардан ортган. Шунда ЯИМ миқдори аҳоли жон бошига камида 3 минг доллардан тўғри келади.
2023 йил ноябрда 2024 йилги иқтисодий ўсиш 5,6—5,8 фоиз атрофида бўлиб, 1,3 квадриллион сўмга етиши прогноз қилинганди.
Изоҳ (0)