Юқорига кўтарилиш ва тушиш ҳар қандай касбда содир бўлиши мумкин ва актёрлик бундан мустасно эмас. Қуйида карьерасини катта роллардан бошлаб, кейин кичик ролларга ўтган ёки карьерасида танаффус қилган актёрларни эслаймиз. Бу рўйхатда кинодаги танаффусидан сўнг янги куч билан катта экранга қайтганлар ҳам, актёрликни бутунлай тарк этишга қарор қилганлар ҳам бор.
Эмма Уотсон
Эмманинг актёрлик карьераси жуда эрта бошланган. “Гарри Поттер”нинг биринчи фильми чиққанида у атиги 11 ёшда эди. Франшизани тугатгандан сўнг, Уотсон кинони тарк этмаган ҳолда таълим олишга қарор қилади. Эмма 2014 йилда бакалавр даражасини олади, 2023 йилда эса юлдуз Оксфордга ўқишга киради.
Афтидан, Уотсон ҳозир бутун диққатини ўқишга қаратганга ўхшайди, чунки унинг иштирокидаги сўнгги фильм — “Кичкина хонимлар” 5 йил олдин экранларга чиққан.
Камерон Диас
2014 йилгача Камерон Диас мунтазам равишда бир нечта прокат фильмларда суратга тушган. 20 йиллик фаолияти давомида юлдуз ўзини барча жанрларда синаб кўришга муваффақ бўлди — жангари фильмлардан тортиб (“Чарли фаришталари”) тарихий драмаларгача (“Нью-Йорк тўдалари”). Афтидан, Диас жуда кўп ишлашдан чарчаган, шунинг учун ҳам танаффус қилган.
Орадан 10 йил ўтганига қарамай актриса бу йил кинога қайтишга ваъда бермоқда.
Меттью Макконаҳи
Меттью Макконаҳи икки марта кинодан кетади. Актёр биринчи марта уни машҳур қилган бир қатор романтик комедиялардан сўнг танаффус қилади. Фарзанди туғилгандан кейин Меттью 2 йил давомида касбини тарк этади ва кейин янги куч билан бутунлай бошқача образда қайтади.
Катта муваффақиятдан сўнг Макконаҳи яна шоу-бизнесни тарк этади. Актёрнинг сўзларига кўра, фаолиятидаги тўрт йиллик танаффус унга янада яхши актёр бўлишга имкон берган. У кўп ўқиган ва ёзган, хайрия ишлари билан шуғулланган. Ҳозирда суратга олиш унга иш эмас, ажойиб дам олишдек туюлади.
Мег Райан
Мег Райан 80 ва 90 йилларнинг ҳар бир йирик сериалида роль ўйнаган ҳолда муваффақиятли карьера қурганди. Аммо кейинчалик Мег экранлардан ғойиб бўлади. Баъзилар бунга шахсий ҳаётидаги муаммолар сабаб бўлганини айтишса, бошқалар бу танаффусни чарчаш билан изоҳлашади. 2015 йилда чиққан “Итака” драмасига Райан ҳам актриса, ҳам режиссёрлик қилади. 2023 йилда эса Мег Девид Духовний билан ромкомда суратга тушади. “Кейин нима бўлади” фильми Райаннинг 8 йил ичида биринчи катта режиссёрлик ва актёрлик иши бўлди.
Жек Николсон
Жек Николсон тирик афсонадир. Актёр ўзининг кетишини расман эълон қилмади, аммо 2010 йилда чиққан фильм муваффақиятидан сўнг Николсон янги роллардан воз кечади. Орадан 14 йил ўтади. Унда Тони Эрдман фильмида суратга тушиш имконияти бор эди, бироқ 2018 йилда актёр фикрини ўзгартириб, таклифни рад этади.
Зои Дешанель
2009 йилда “Ёзнинг 500 куни” романтик комедияси чиққанида Зои ҳақиқий юлдузга айланади. Ушбу ажойиб муваффақиятдан сўнг, актриса яна бир нечта лойиҳаларда, жумладан, “Янги келган қиз” ситкомида бош ролни ўйнайди. Актёрлик карьераси билан бир қаторда, Зои мусиқани ўрганган ва вақти-вақти билан қўшиқ ёзиш, фестивалларда чиқиш учун фильмлардан танаффус қилган. 2022 йилда Дешанель “Ёввойи тушлар” фильмидаги роли билан катта кинога қайтди. Бу унинг 7 йил ичидаги биринчи йирик иши бўлди.
Иэн Сомерхолдер
Афтидан, “Ҳаёт-мамот” ва “Вампир кундаликлари” фильми юлдузи актёрлик фаолиятини якунлаётганга ўхшайди. Унинг иштирокидаги сўнгги тўлиқ метражли фильм 2016 йилда чиққан. Ҳозирда собиқ актёр рафиқаси Никки Рид билан фарзандларини тарбиялайди ва бизнес билан шуғулланади. У рафиқаси билан биргаликда озиқ-овқат қўшимчалари ишлаб чиқарувчи компанияни бошқаради.
Лара Флинн Бойл
Лара Флинн Бойл 90 йилларда юлдуз эди. У иккита култ телесериал туфайли машҳур бўлади — “Эгизак чўққилар” ва “Эмми” мукофотига номзод бўлган “Амалиёт” сериаллари, шунингдек, актриса “Қора либосли одамлар 2” блокбастерида асосий роллардан бирини ўйнайди. Ушбу муваффақиятдан кейин у асосан кам бюджетли фильмларда иштирок этади. Сўнгги йилларда актриса экранлардан бутунлай ғойиб бўлди. Унинг охирги асарлари — “Омадли ит” (2014) ва “Бир пайтлар Техасда” (2020) номли фильмлар бўлди.
Изоҳ (0)