Тадқиқотларга кўра, ижтимоий тармоқлардан фаол фойдаланувчилар Ер аҳолисининг 60 фоиздан кўпроғини ташкил этади ва улар ҳар куни миллионлаб хабарлар, сурат ва видеороликлар жойлаштиради. Аммо ижтимоий тармоқлардан фойдаланишни хоҳламайдиган Голливуд юлдузлари ҳам бор. Forbes Life ижтимоий тармоқларда рўйхатдан ўтмаган ва шахсий ҳаётини ҳимоя қилаётган машҳурлар ҳақида маълумот беради.
Эмма Стоун
Эмма Стоун Twitter аккаунти 2012 йилда бузилгач, ижтимоий тармоқлардан фойдаланишни тўхтатади. Шундан бери актриса бирорта ҳам платформада саҳифага эга эмас. 2014 йилда Стоун ўз қарорини шундай тушунтирган: у замонавий дунёда одамларнинг ҳаёти тез-тез ижтимоий тармоқлардаги фаолиятлари ва “қайси фотолари маълум бир кунда энг яхши кўрилишини” танлашлари орқали “қурилишини” ёқтирмайди.
Жорж Клуни
Актёр Жорж Клунининг фикрича, ижтимоий тармоқларга пост қўйиш муаммоли вазиятга тушиб қолишнинг осон йўлидир. 2009 йилда Торонтода ўтказилган кинофестивалда журналистлар билан суҳбатда у шундай деганди: “Ижтимоий тармоқларда ҳар ким оғзига келган гапни осонликча гапириб қўйиши мумкин. Менимча, ўзим ҳақимдаги маълумотлар бу қадар очиқ бўлиши керак эмас”.
Женнифер Лоуренс
Женнифер Лауренс 2014 йилдан бери ижтимоий тармоқлардан фойдаланмайди, чунки хакерлар унинг iCloud ҳисобини бузиб, бир нечта шахсий расмларини интернетга тарқатиб юборган. Бундан ташқари, актриса бир неча бор ижтимоий тармоқлардан фойдаланиш унга қулай эмаслигини ва интернетнинг унга “ортиқча юк” экани ҳақида айтган.
“Ҳеч қачон Twitter аккаунтим бўлмаган. Мен телефонга ва технологияларга унчалик яхши тушунмайман. Ҳатто электрон почтамни ҳам кузатишим қийин, шунинг учун Twitter аккаунти очиш ғояси мен учун ўйлаб бўлмайдиган иш”, — деган актриса 2014 йилда BBC Radio 1 эфирида.
Брэд Питт
Актёр Брэд Питт 2014 йилдаёқ ижтимоий тармоқларда рўйхатдан ўтишни хоҳламаслигини айтган, гарчи уларда маълум афзалликларни кўрган бўлса ҳам. GQ журналига берган интервьюсида у интернетдаги аккаунтларнинг машҳурларга улар ҳақидаги миш-мишларни тезда рад этиш учун фойдали бўлиши мумкинлигини таъкидлаган.
“Улардан фойдаланган ҳолда дарҳол ўзингиз ҳақингиздаги нотўғри миш-мишларга қарши кураша оласиз. Агар ёшлигимда ижтимоий тармоқлар мавжуд бўлганида, мен эҳтимол улардан фойдаланган бўлардим. Лекин ҳозирги пайтда бундай нарсалар билан ўзимни чалғитмоқчи эмасман”, — деб тушунтирган Питт.
Дэниел Редклифф
Актёр Дэниел Редклифф учун ижтимоий тармоқлардан воз кечиш махфийликни ҳимоя қилиш масаласидир. Редклифф Twitter’ни “интеллектуал” платформа деб ҳисобламаслигини ҳам тушунтирган, чунки унда бутунлай бегона одамлар билан осонгина баҳсга киришиб кетиш мумкин.
Бундан ташқари, у ижтимоий тармоқлардан фойдаланишни хоҳламайди, чунки “Гарри Поттер” фильмларида суратга тушиш пайтларида ўзига етарлича салбий танқидлар эшитган.
Скарлетт Йоханссон
Скарлетт Йоханссон 2011 йилда берган интервьюсида шундай деган: “Менинг Facebook ёки Twitter’да аккаунтим йўқ. Мен кундалик ҳаётимнинг деталларини доимий равишда ижтимоий тармоқда бўлишишни тасаввур қила олмайман”. Шундан бери вазият ўзгармаган, актриса ҳали ҳам ҳеч қандай ижтимоий тармоқдан фойдаланмайди.
Эдди Mёрфи
2016 йилда Британия нашри The Independent Эдди Mёрфини луддит сифатида таърифлаган — бу атама XVIII аср охири - ХIX аср бошларида Англияда саноат инқилобига қарши чиққан ва иш ўринларини йўқотишдан қўрқиб, машиналар ва станокларнинг ўйлаб топилишига қарши чиққан намойишчиларга берилган эди. Бунинг сабаби актёрнинг ижтимоий тармоқлардаги аккаунтлардан тортиб электрон почта манзили, ҳатто компьютери йўқлигини айтган изоҳи эди.
Mёрфи бундай воситалардан фойдаланмасликка қарор қилишини, бошқа бировлар билан “кундалик ҳаётнинг икир-чикирлари”ни бўлишиш заруратини ҳис қилмаслиги билан изоҳлаган. “Мен ижтимоий тармоқларда мухлисларим билан мулоқот қилишим ёки Twitter’да мен ҳозиргина қулупнай едим деб ёзишим шарт эмас. Мен ҳеч қачон бундай иш қилмайман”, — деган у 2022 йилда Тhе Hollywood Reporter нашрига берган интервьюсида.
Изоҳ (0)