Тошкент, Фарғона водийси ва мамлакатнинг турли ҳудудларида электр техника маҳсулотларини ишлаб чиқаришга ихтисослашган саноат-инновацион технопарклари ташкил этилиши режалаштирилмоқда, бу ҳақда ЎзА хабар қилади.
Бу Президент Шавкат Мирзиёевнинг 2019 йил 30 майдаги «Электротехника саноатини янада ривожлантириш учун қулай шарт-шароитлар яратиш ва тармоқнинг инвестициявий ҳамда экспорт салоҳиятини ошириш бўйича қўшимча чора-тадбирлар тўғрисида»ги қарорида кўзда тутилган.
Сўнгги йилларда мамлакатда электр техника саноати фаол ривожланмоқда. Тармоқ корхоналари янги ишлаб чиқариш технологияларини самарали ўзлаштирмоқда ва ишлаб чиқарилаётган маҳсулот турини кенгайтирмоқда. Ўзбекистондаги электр ускуналари ишлаб чиқарувчиларни қўллаб-қувватлаш мақсадида жорий йилнинг 1 июлидан бошлаб уларга янги имтиёз ва преференсиялар тақдим этилади.
Хусусан, электр техника ва маҳсулотлари бўйича давлат харидини амалга оширишда маҳаллий ишлаб чиқарувчиларга нисбатан 20 фоизгача бўлган нарх преференсияси қўлланилади. Бундан ташқари, давлат бюджети ҳисобидан объектларни тайёр қурилиш ёки реконструксия қилиш бўйича тендер ҳужжатларида Ўзбекистонда ишлаб чиқариладиган маҳсулотни харид қилиш кўзда тутилади.
Айни дамда «Ўзэлтехсаноат» уюшмаси таркибидаги корхоналар шахсий эҳтиёжлари учун зарур бўлган Ўзбекистонда ишлаб чиқарилиши ҳали йўлга қўйилмаган хом ашё, материаллар, бутловчи қисмлар ва ускуналарни олиб киришда 2020 йил 1 январга қадар божхона тўловларидан озод этилади. Маҳаллий бозорда соғлом рақобатни таъминлаш мақсадида Ўзбекистон Республикаси Давлат божхона қўмитаси мамлакатга электр техника ва маҳсулотларнинг ноқонуний олиб кирилишига ёрдам берадиган омилларни таҳлил қилади ва уларни бартараф этиш чораларига доир дастур ишлаб чиқади.
Ўзбекистон Республикаси Молия вазирлигининг қарорига мувофиқ, «Ўзэлтехсаноат» уюшмаси ҳузуридаги Электр техника саноатини ривожлантириш жамғармасига 20 миллиард сўм маблағ ўтказилади. Мазкур маблағлар илмий-тадқиқот ва тажриба-конструкторлик ишланмаларини молиялаштириш, стартапларни қўллаб-қувватлаш ва устав фондларини шакллантириш, маҳаллий корхоналарда халқаро стандартларни жорий этиш учун сарфланадиган харажатларнинг 50 фоизини қоплаш учун йўналтирилади. Шунингдек, ушбу маблағлар сармоядорларни жалб қилиш ва ишлаб чиқаришларни йўлга қўйиш учун бўш ётган бино ва иншоотларни таъмирлаш ва реконструксия қилиш учун сарфланади. Бундан ташқари, маҳаллий корхоналар фонд ҳисобидан тендер савдоларида иштирок этиш учун қисқа муддатли молиявий кафолат олиши ҳам мумкин.
Янги ҳужжат яқин истиқболда мамлакат электр техника саноатини ривожлантиришнинг асосий йўналишларини белгилаб берди. Ушбу қарор билан 2019—2020 йиллар учун «йўл харитаси» ҳамда 2019—2021 йилларда ишлаб чиқаришни маҳаллийлаштириш ва кенгайтиришга тавсия этиладиган маҳсулотларнинг амалга ошириладиган ва истиқболли инвестиция лойиҳалари рўйхати тасдиқланди.
Изоҳ (0)