Фарғона вилояти ҳокими Хайрулло Бозоров вилоятнинг Қувасой шаҳридаги барча боғчаларга тайёр овқат етказиб бериш ҳуқуқини ҳеч қандай танлов ёки тендерсиз тадбиркорга туҳфа қилди. Ҳокимнинг бу ҳақдаги қарори жамоатчиликдан яширилган. Бу ҳақда Telegram’даги Generalissimus канали ёзмоқда.
Канал муаллифининг маълумот беришича, қонунчиликка асосан давлат мактабгача таълим ташкилотларида тадбиркорлар томонидан соғлом овқатлантиришни ташкил этиш — Мактабгача ва мактаб таълим вазирлиги томонидан ўтказиладиган танлов натижаларига кўра ташкил қилиниши керак.
Фарғона вилояти ҳокими ўз қарорига асосан Қувасой шаҳридаги давлат мактабгача таълим ташкилотларида тарбияланувчиларни кейтеринг (тайёр овқат етказиб бериш) усулида овқатлантиришни танлов ёки тендер ўтказмасдан бир корхонага ўтказиб берди. Ва энг асосийси, бу қарор “Ушбу ҳужжат мазмунида шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги туфайли яширилган” важи билан оммадан яшириб қўйилган. Лекин қарорда шахсга доир ҳам, васийлик ва ҳомийликка оид ҳам, фойдаланилиши чекланган ахборот ҳам мавжуд эмас, дейилади бу ҳақдаги хабарда.
Хабар муаллифи, шунингдек, ҳоким туҳфасига эришган Garden catering trade МЧЖ раҳбари ва ҳоким фамилияси бир хил эканига эътибор қаратган.
Балки тасодифдир, қариндошмасдир, дейди у.
“Дарё” журналисти ҳокимнинг ушбу ҳаракатига изоҳ олиш мақсадида вилоят ҳокимлиги ахборот хизмати раҳбари Дилмурод Жумабоев билан боғланди. Саволни эшитган масъул “Ҳозир нима ҳақида гапираётганингизни билиш учун ўша Telegram каналига кириб, хабарни ўқиб, бир оздан сўнг қўнғироқ қиламан ва маълумот бераман”, деди. Бироқ айтилган фурсатда на ўзи қўнғироқ қилди, на қилинган қўнғироққа жавоб қайтарди.
“Дарё” вилоят ҳокимлиги ахборот хизматига минбар беришга тайёрлигини маълум қилади.
Изоҳ (0)