Тошкент вилоятида жойлашган “Махам-Чирчиқ” АЖ 2022-2024 йилларда ўтказилган 3 та тендерда “Якка тартибдаги тадбиркор” ғолиб бўлган. Қолган олтита танловда захира ғолиби сифатида кўрсатилган. Қизиғи, танловларда ғалаба қозонаётган бу тадбиркорнинг кимлиги мутлақо номаълум. Чунки тендер ҳужжатларида ғолиб ҳақида ҳеч қандай маълумотлар мавжуд эмас.
“Дарё” мухбири “Махам-Чирчиқ” ўтказган тендерлар маълумотларини кўздан кечириш жараёнида бир қатор шубҳали ҳолатларга дуч келди.
Гап шундаки, жамият 2024 йилнинг 26 декабридан 2025 йилнинг 7 январига қадар экскаватор билан таъминлаш хизмати бўйича 468 миллион сўмдан ортиқ бошланғич нарх таклиф қилинган тендер ўтказган. Тендерда бир нафар фуқаро ва “Якка тартибдаги тадбиркор” рақобатлашган ва унда фуқаро Намозов Қодир Ашурович 466 миллион 567 минг сўм таклиф қилиб, ғолиб чиққан. “Сирли” якка тартибдаги тадбиркор эса захира ғолиби сифатида кўрсатилган.
Ушбу тадбиркор 2022-2024 йилларда “Махам-Чирчиқ” ўтказган жами 9 та тендерда қатнашган. Харид комиссиясининг хулосаларига кўра, у учта лот бўйича ғолиб деб топилган. Қолган 6 та ҳолатда эса захира ғолиби сифатида келтирилган. Аммо юқорида таъкидланганидек, бу тендерларнинг бирортасида у ўзи ҳақидаги маълумотларни келтирмаган.
Бу — қонунчиликка зид. “Давлат харидлари тўғрисида”ги қонуннинг 69-моддасига мувофиқ, Таклифларни кўриб чиқиш ва баҳолаш баённомасида таклифлари кўриб чиқилган тендер иштирокчилари тўғрисида маълумотнома ва ғолибнинг номи ёки фамилияси, исми, отасининг исми ҳамда почта манзили бўлиши шарт.
Қизиқ жиҳати “Якка тартибдаги тадбиркор” фақатгина бир нафар иштирокчи ариза топширган тендерларда қатнашган. Шунингдек, иштирокчиларнинг таклифлари маъқул келмаган тендерларда ҳам ўз таклифларини берган.
Бундан кўриниб турибдики, “Махам-Чирчиқ” қонун талабларини айланиб ўтиш орқали қонунбузилишларга йўл қўйган бўлиши мумкин.
Икки йилдан буён ушбу ҳолатларга давлат харидлари соҳаси устидан назорат қилувчи ваколатли органларининг эътибор қаратмаганлиги эса янада ажабланарли.
Benefitсиари аниқ бўлмаган иштирокчилар таклиф бериши мумкинми?
Нега икки йилдан бери жамият харид комиссияси қонун талабларини бузиб келмоқда?
Маълумот учун, “Махам-Чирчиқ” АЖ 1991 йилда давлат рўйхатидан ўтказилган бўлиб, улушининг 51 фоизи “Ўзкимёсаноат” акциядорлик жамиятига, қолган 49 фоизи эса “Махамcорп International С.Л.” корхонасига тегишли. Яъни корхона давлат улуши мавжуд ташкилотлардан бири ҳисобланади.
“Дарё” масъуллардан шу саволларга жавоб кутади.
Изоҳ (0)