2024 йилда қўшни фирма ана шу тендерлар асосида салкам 8 миллиард сўмлик иш бажарди. Бундан ташқари, буюртмачи билан жами 5 та 2,5 миллиард сўмлик тўғридан тўғри шартнома ҳам имзоланган. “Дарё” мухбири харид ҳужжатларини ўрганиши давомида доимий ғолиб ва буюртмачи бир-бирига жуда яқин манзилда жойлашганини аниқлади.
Қарши магистрал каналидан фойдаланиш бошқармаси 6—13 январь кунлари Туркманистон ҳудудий жойлашган насос станцияларида насос агрегатларининг 14 дона йўналтирувчи подшипникларини қайта тиклаш ишларини бажариш бўйича тендер ўтказди. Лотнинг бошланғич қиймати салкам 314 миллион сўмликни ташкил этган.
Унда “Агро Сув Тех Монтаж” ва “Сурхоннасостаъмир” МЧЖлар рақобатлашган ва якуний натижаларга кўра, “Агро Сув Тех Монтаж” ғолиб деб топилган. Шартнома суммаси — 283 миллион сўм деб белгиланган.
Статистика агентлиги маълумотларига кўра, ғолиб Қашқадарё вилояти, Нишон тумани, Талимаржон шаҳри, Мустақиллик кўчаси, 1-уйда жойлашган. Жамият таъсисчиси – Байматова Моҳира Тураевна, раҳбари эса Ниязов Ёрқин Эркинович ҳисобланади.
Эътиборлиси ва шубҳалиси шундаки, буюртмачининг манзили ҳам Талимаржон шаҳри, Мустақиллик кўчаси, 5-уйда жойлашган. Яъни, Қарши магистрал каналидан фойдаланиш бошқармаси ғолибдан тўртта уй нарида фаолият юритади.
Бошқарма томонидан Ўзбекистон Республикаси товар-хом ашё биржасига жойлаштирилган тендерларни ўрганиш давомида 2024 йилда ўтказилган 39 та тендернинг 21 тасида қўшни фирма ғолиб бўлганлиги аниқланди. Ўтган йилда фирма томонидан тендер асосида салкам 8 миллиард сўмлик ишлар бажарилган.
“Агро Сув Тех Монтаж” МЧЖ ғолиб бўлган тендерлар
“Дарё” мухбири ҳолат юзасидан харид комиссияси раисидан аъзосидан изоҳ олди.
Бошқарма бошлиғининг биринчи ўринбосари Сафо Полвонов корхона иш бажариши, Туркманистонга ўтиш имконияти ва техникалар мавжудлигига қараб ютган бўлиши кераклигини билдирган. Тўлиқ жавоб бериш учун ҳужжатларни кўриш лозимлигини билдирган. Шунингдек, фирма Россиядан маҳсулот олиб келиши ортидан ютган бўлиши мумкинлигини айтиб, ҳужжатларсиз аниқ бирор нарса дея олмаслигини қўшимча қилган.
Бундан ташқари, бошқарма ва “Агро Сув Тех Монтаж” МЧЖ ўртасида 2023—2024 йиллар давомида жами 5 та 2,5 миллиард сўмлик тўғридан тўғри шартнома имзоланган.
Масъуллардан ушбу тендерлар натижаларига эътибор қаратиб, шубҳали ҳолатларни назоратга олишни сўраймиз.
Изоҳ (0)