Фарғона вилояти “Ёзёвон тумани йўллардан фойдаланиш” унитар корхонаси буюртмачилигида ўтказилан тендер натижалари бекор қилинди, деб хабар беради Коррупцияга қарши курашиш агентлиги.
Қайд этилишича, агентлик томонидан ўтказилган мониторинг натижасида “Ёзёвон туман йўллардан фойдаланиш” унитар корхонаси буюртмачилигида ички хўжалик йўлларида амалга ошириладиган жорий таъмирлаш ишлари учун олинадиган ТИБ-Б М-1 маркали асфальт сотиб олиш мақсадида 2023 йил 10 апрель куни ўтказилган 3 миллиард 494 миллион сўмлик давлат харидида бир қатор қонунбузилишларига йўл қўйилгани аниқланган.
Хусусан, ушбу давлат харидида “Давлат харидлари тўғрисида”ги қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 23-моддаси (харид қилиш тартиб-таомиллари иштирокчиси) ва 42-моддаси (иштирокчини харид қилиш тартиб-таомилларида иштирок этишдан четлатиш шартлари) талабларига амал қилинмаган.
Яъни давлат харидида иштирок этган битта манзилда фаолият юритувчи 2 та МЧЖнинг раҳбари ва таъсисчиси бир киши экани яққол кўриниб турган бўлса-да, мавжуд аффилланганлик ҳолатларига баҳо берилмаган ва ноҳалол рақобатни келтириб чиқаргани ўрганилмаган ҳамда ҳолат бўйича танловни ўтказишни вақтинчалик бекор қилиш чоралари кўрилмаган.
Мазкур ҳолатлар бўйича харид комиссиясининг баённомасини бекор қилиш тўғрисида агентлик томонидан 10 апрель куни буюртмачига тақдимнома киритилган ҳамда қонуний чора кўриш учун тўпланган ҳужжатлар Иқтисодиёт ва молия вазирлиги ҳузуридаги Давлат молиявий назорати инспекциясига юборилган.
Агентлик тақдимномасига биноан Ёзёвон туман йўллардан фойдаланиш унитар корхонаси томонидан 11 апрель куни харид комиссиясининг баённомаси бекор қилинган.
Аввалроқ Урганч шаҳар ихтисослаштирилган санъат мактаб-интернати буюртмачилигида иссиқ овқат билан таъминлаш бўйича ўтказилган 731 миллион сўмлик, Асака туманида эса тиббиёт бирлашмаси ўтказган 620 миллион сўмлик тендерлар бекор қилинганди.
Изоҳ (0)