Фарғонада қурилиш идораси ўтказган 162 млн сўмлик тендерда рақобат қилган корхоналар бир тадбиркорга тегишли экани аниқланди
Фарғона йўл қурилиш-таъмирлаш унитар корхонаси томонидан 23—29 март кунлари қиймати қарийб 170 миллион сўмлик тендер ўтказилган. “Дарё” мухбири мазкур маълумотларни кузатиш жарайонида тендердаги рақобатчи корхоналар бир шахсга тегишли эканини аниқлади.
Ўтказилган тендерда Дамкўл Азия хусусий корхонаси ва “Барчаси Қурилиш Учун” МЧЖ қатнашган. Лойиҳа смета маълумотларида ёзилишича, тендер ғолиби буюртмачига қурилиш ишлари учун қум-шағал аралашмаси етказиб бериши керак.
Ҳакамларнинг якуний баҳоларига кўра, “Барчаси Қурилиш Учун” МЧЖ 100 балл билан тендер ғолиби деб топилган. Шартнома суммаси 162 милион 698 минг сўм. Дамкўл Азия хусусий корхонаси эса захира ғолиб сифатида кўрсатилган.
Тендер иштирокчиларининг раҳбарияти билан танишиш жарайонида шубҳали ҳолатга дуч келдик. Статистика агентлиги маълумотларига кўра, харидни қўлга киритган “Барчаси Қурилиш Учун” МЧЖнинг раҳбари Раҳимов Миршод Алишерович ҳисобланади. Корхонанинг юридик манзили Фарғона вилояти Фарғона туманида деб кўрсатилган.
Эътиборлиси, тендерда унга рақобат таклиф этган Дамкўл Азия хусусий корхонасининг ягона таъсисчиси ва раҳбари ҳам айнан юқорида исми зикр этилган Раҳимов Миршод Алишерович ҳисобланади. Бу корхона ҳам Фарғона вилояти Фарғона туманида жойлашган.
Аммо “Давлат харидлари тўғрисида”ги қонуннинг 68-моддасига кўра, тендер иштирокчиси фақат битта таклиф беришга ҳақли.
Тегишли ташкилот ва идоралардан ҳолатга муносабат билдиришни кутиб қоламиз. “Дарё” воқеалар ривожини кузатишда давом этади.
