26 январь куни Ўзбекистон Республикаси товар-хом ашё биржасида 100 дан ортиқ тендерлар амалга оширилди. “Дарё” мухбири Абдуқаҳҳор Қосимов ҳужжатларни мониторинг қилиб, энг эътиборга молик савдолар ҳақида маълумот беради.
Ходимларни овқатлантиришга 1,361 миллиард сўм
Сурхондарё вилояти ҳокимлиги ходимларига 2023 йил учун овқатланиш хизматларини етказиб бериш бўйича тендер ўтказган. Протоколга кўра, таомномада ош, гречка, товуқ шўрва, қовурма лағмон каби овқатлар бўлиши керак.
Тендер комиссияси баёнига кўра, ғолиблик учун ”Диёрбек Ошхонаси” ва “Гранд Декабрь” МЧЖлар қатнашган. Якунда 1 миллиард 361 миллион 360 минг сўмлик тендерни “Диёрбек Ошхонаси” ютиб олган.
Бир “э-маил”ли рақобатчилар
Фарғона вилояти Марғилон шаҳри мактабгача таълим бўлими котёл сотиб олиш учун 30 миллион сўмлик тендер ўтказган. Унда “Зилол Фин Expert” хусусий корхонаси, “Тошлоқ Шинам” ва “Мухаммад Умар Building” МЧЖлар иштирок этган.
Баённомага кўра, тендер якунида “Zilol Fin Expert” ғолиб, “Мuhammad Umar Building” эса захира ғолиб деб топилган.
Ғолиб ХКнинг таъсисчиси ва раҳбари Орипова Зилола Марифжоновна. Корхона Фарғона шаҳрида жойлашган, почта манзили эса oripova04@mail.ru.
Захира ғолиб МЧЖ раҳбари бошқа — Турабоев Қобил Хайриддин ўғли. Аммо электрон почта манзил рақобатчисиники билан бир хил.
Яна ўша эски тадбиркор
20 январь куни эълон қилинган материалимизда бир тадбиркорга тегишли икки корхона бир тендерда қатнашиб, “Давлат харидлари тўғрисида”ги қонун моддалари бузилгани ҳақида ёзгандик.
Аммо бир ҳафта ўца ҳамки, тендер натижалари бўйича текширув ўтказилмади, натижалар бекор қилингани йўқ. Шу сабабли кейинги савдо кунлари давомида ҳам худди шу тадбиркор билан яна икки марта қонун бузилиш ҳолатлари содир этилди.
Биринчиси. Жиззах вилоят тери-таносил касалликлари диспансери овқат етказиб бериш бўйича аутсорсинг учун тендер эълон қилди, савдо 26 январь куни якунланди. Унда Убайдуллаев Акмалжон Эштурдиевичга тегишли Tesla-S МЧЖ ва Testy Meal Plus МЧЖ беллашди. Комиссия аъзолари рози, ғолиб Testy Meal Plus билан 13 миллион 177 минг сўмлик шартнома имзоланди.
Иккинчиси. 27 январь куни ҳам яна ўша Жиззах вилоят тери-таносил касалликлари диспансери овқат етказиб бериш бўйича ўтказган тендер якунланди. Яна ўша икки тадбиркорлик субъекти (шунингдек, жуда паст балл қайд этган Ота Servicegroup МЧЖ) қатнашди. Тендерни Testy Meal Plus МЧЖ ютиб олди. Шартнома суммаси бу сафар қарийб 20 миллион сўм.
“Дарё” мухбири тадбиркор билан боғланишга уринди, аммо МЧЖлар билан алоқа сифатида кўрсатилган рақам “нотўғри” экан.
“Йўқ, адашдингиз”
“Намангандонмаҳсулотлари” акциядорлик жамияти элеваторга буғдой ташиш хизмати учун 200 миллион сўмлик тендер ўтказди. Лотни Trade Actives ютиб олди, Spark Аrenа МЧЖ эса захира ғолиб сифатида кўрсатилди.
Аммо ушбу МЧЖлар бир тадбиркорга тегишли.
Ҳолат юзасидан Умаров Файзулло билан боғланишга уриндик, аммо гўшакни кўтарган шахс адашиб бошқа манзилга тушганимизни айтди.
Дубайга саёҳат
Ўзбекистон Давлат жаҳон тиллари университети 10 нафар иқтидорли талабани Дубайга дам олишга жўнатади. Саёҳатни ташкил этиш учун эса 128 миллион сўмлик тендер ўтказилди.
Тендерни Golden Cоin-Tour МЧЖ ютиб олди. Техник топшириққа кўра, ғолиб қуйидаги хизматларни кўрсатиши керак:
Тушунмасдан тендерни ютган тадбиркор
Наманган вилояти Чуст туман Тиббиёт бирлашмаси тиббий тарози харид қилиш учун 57,5 миллион сўмлик тендер ўтказган. Унда ғолиб бўлган Beruniy Medical ва захира ғолиб Glyucomed МЧЖларнинг иккиси ҳам бир тадбиркор — Обидов Муҳаммадюсуф Аҳмад ўғлига тегишли.
“Дарё” мухбири Муҳаммадюсуф Обидов билан боғланди. Унга вазият юзасидан савол берилганида тендерда ҳақиқатан ҳам иккита МЧЖ билан қатнашганини тан олди.
“Ҳа, қатнашганман. Аммо бунинг нотўғри эканини билмагандим, унча тушунмайман. Бухгалтерим билан гаплашай-чи”, — деди тадбиркор.
Комиссия аъзолари эса ҳолатни ё пайқамаган, ё кўриб, кўрмаганликка олган. Ҳар ҳолда 5 нафар комиссия аъзосининг бирортаси ҳам тендер натижаларига қарши овоз бермаган.
Масъуллардан ушбу шубҳали тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.
Изоҳ (0)