Москва яқинидаги Реутов шаҳрида ҳуқуқ-тартибот идоралари ходимлари томонидан 16 ёшли ўсмир ўз мактабида теракт тайёрлаганликда гумон қилиниб қўлга олинди.
Аниқланишича, ўсмир 1-рақамли мактабда теракт уюштирмоқчи бўлган. Қўлга олиш чоғида ундан учта пичоқ ва “далил аҳамиятидаги кўплаб ёзувлар” топилгани маълум қилинган. У Тожикистондан келган бўлиб, Россияда рўйхатдан ўтмаган. Ҳуқуқ-тартибот идоралари ходимлари унинг ижтимоий тармоқларда Россиядаги умумтаълим муассасаларига уюштирилиши мумкин бўлган ҳужумлар муҳокама қилинган “Колумбайн” гуруҳига қўшилганини тахмин қилишмоқда.
ТАСС ахборот агентлиги Москва вилояти таълим вазирлигига таяниб, содир бўлган воқеа юзасидан жиноий иш қўзғатилганини хабар қилмоқда. Реутовдаги ҳодисадан сўнг минтақадаги барча таълим муассасаларида террорчиликка қарши хавфсизлик чоралари кучайтирилди.
Кейинроқ Тергов қўмитаси бошқармаси мактаб ўқувчисининг қўлга олингани ҳақидаги маълумотни тасдиқлади. Идоранинг таъкидлашича, иш террорчилик ташкилотида иштирок этиш моддаси (Жиноят кодексининг 205.5-моддаси 2-қисми) бўйича қўзғатилган.
Хабарда айтилишича, гумонланувчининг исми Руслан С. бўлиб, у мактабга бостириб кириб, ўқувчиларга ҳужум қилишга тайёргарлик кўрган.
Аввалроқ Курскда қора ниқоб таққан, болға билан қуролланган 16 ёшли ўсмир мактабга бостириб кирган эди. Қайд этилишича, ўсмир бинога югуриб кириб, йўлакдаги битта ойнани синдирган.
Шундан сўнг таъқибларга қарамай, тўсиқсиз кўчага отилиб чиққан ва бир вақтнинг ўзида олд эшик ойнасини болға билан синдирган. Қочиб кетаётиб иккита пичоқ ва бир шиша ёнувчи суюқлик солинган сумкани улоқтириб юборган. Бутун ҳодиса 2 дақиқадан кўпроқ вақт ичида содир бўлган. Ўсмир кейинроқ қўлга олинган.
Изоҳ (0)