Қирғизистон ва Тожикистон баҳсли ҳудудларни тенг тақсимлади. Бу ҳақда Қирғизистон етакчиси Садир Жапаровга таяниб Спутник Қирғизистон хабар берди.
Президентнинг сўзларига кўра, ҳукуматлараро комиссия ҳар икки мамлакат манфаатларини ҳисобга олган.
“Айтиш мумкинки, баҳсли масалаларда ўзаро келишувга эришдик, низоли ҳудудларни тенг тақсимлаб олдик”, деди президент.
Унинг сўзларига кўра, баъзи жойларда томонлар ҳудудларни алмашишга келишиб олган. Ҳукуматлараро комиссия ишини якунлагач, Қирғизистон ва Тожикистон ўртасидаги чегара очилади.
“Чегара постлари уч йилдан бери ёпилган. Оқибатда иккала томон ҳам иқтисодий йўқотишларга учради. Савдо тўхтатилди. Энди биз чегара постларини очамиз ва икки давлат ўртасидаги савдони энг юқори даражага кўтаришимиз керак”, дейди Жапаров.
Қирғизистон раҳбари қўшни мамлакатлар ўртасида бундан буён келишмовчиликлар бўлмаслиги кераклигини таъкидламоқда.
“Чегаралар муаммоси ҳал этилгач, ҳар икки халқнинг ҳаёти яхшиланади”, дея ишонч билдирган у.
Декабрь ойи бошида Қирғизистон ОАВ Қирғизистон ва Тожикистон чегараларни делимитация қилиш жараёнини тўлиқ якунлагани ҳақида хабар берган эди.
2022 йилнинг кузида мамлакатлар ўртасида чегара можароси кескинлашган. Томонлар жанговар ҳаракатлар бошланишида бир-бирларини айблаган эди. Қирғизистон Ташқи ишлар вазирлиги отишма натижасида 63 нафар қирғизистонлик ҳалок бўлгани, ҳукумат 140 мингга яқин кишини эвакуация қилганини маълум қилган. Тожикистон ТИВ 83 нафар тожикистонлик ҳалок бўлганини айтган.
Изоҳ (0)