АҚШ Россияни айнан Crocus’да теракт бўлишидан огоҳлантирган — WP
АҚШ Россияни айнан Crocus City Hall’да теракт юз бериши мумкинлигидан огоҳлантирганди. Бу ҳақда Америка ҳукумати доираларидаги аноним манбаларга таяниб, Тhе Washington Post хабар берди.
Фото: Euromaidan press
Манбаларга кўра, ИШИД томонидан кутилаётган теракт ҳақидаги огоҳлантириш 6 март куни Россияга тақдим этилган. Унда айнан Crocus’га ҳужум қилиниши кутилаётгани айтилган. Эртаси куни Американинг Москвадаги элчихонаси ўз фуқароларини ҳужум таҳдиди ҳақида огоҳлантириб, “концертлар” ҳужумнинг эҳтимолий нишони бўлишини таъкидлаган.
2 апрель куни Россия Ташқи разведка хизмати раҳбари Сергей Наришкин Федерал хавфсизлик хизмати (ФХХ) Америка разведкасидан “аниқ маълумотлар” олганини, аммо “маълумотлар жуда умумий бўлиб, бу даҳшатли жиноят содир этишда иштирок этганларни тўлиқ аниқлашга имкон бермагани”ни айтганди.
Америка разведка идоралари яқинлашиб келаётган терактлар ҳақида олган маълумотларини ҳатто душман давлатлар билан ҳам баҳам кўради, масалан, улар Эронни январь ойида ИШИД Керманда ҳужумга тайёргарлик кўраётгани ҳақида огоҳлантирган, — дейди аноним манба.
3 январь куни Эрон жануби-шарқидаги Керман шаҳрида Қосим Сулаймоний вафотининг тўрт йиллиги хотирасига бағишланган мотам маросимлари чоғида теракт юз берганди. Оқибатда 95 киши ҳалок бўлган, 211 киши жароҳатланганди.
АҚШ томонидан яқинлашиб келаётган ҳужумлар тафсилотлари камдан-кам хабар қилинади, чунки бу разведка маълумотларини йиғиш манбалари ва усулларини ошкор қилишга олиб келиши мумкин, дейди Washington Post манбалари ва экспертлари.
Crocus’даги теракт
Москва вилояти Crocus City Hall’даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 143 киши ҳалок бўлган, юзлаб одамлар жароҳатланган. Ҳужумни содир этишда Тожикистоннинг тўрт нафар фуқароси айбланган, суд улар айбига иқрор бўлганини маълум қилган.
Мазкур ҳолатдан кейин Россияда мигрантларга нисбатан муносабат ўзгарган. Тожикистон президенти ҳужумни “шармандали ва даҳшатли воқеа” деб атаган ҳамда ота-оналарни фарзандлари тарбиясига жиддийроқ эътибор қаратишга чақирган.
Ўз навбатида, Россия терговчилари теракт иштирокчиларининг оиласини сўроқ қилиш учун Тожикистонга борган. Шундан кейин Ваҳдат шаҳрида яшовчи тўққиз нафар тожикистонлик Crocus’даги теракт ижрочилари билан алоқадорликда айбланиб, қўлга олинган. Ҳибсга олинганлар ИШИД билан алоқада бўлганликда ҳам гумон қилинмоқда.
Доғистонда ҳам аксилтеррор операция ўтказилиб, тўрт нафар Тожикистон фуқароси ушланган. Улар терактнинг асосий иштирокчиларини қурол ва пул билан таъминлагани айтилмоқда. Россия Ташқи ишлар вазирлиги Украина ҳукуматини расман Crocus City Hall’даги терактда айблаган. Украина расман мазкур айбловларни рад этган. Ўз навбатида, ИШИДнинг Афғонистондаги бўлими “Вилояти Хуросон” ушбу ҳужум учун жавобгарликни ўз зиммасига олишини бир неча бор таъкидлаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)