Давлат хавфсизлик хизмати Чегара қўшинлари ва божхона органлари билан ҳамкорликда ўтказган тезкор тадбирда Ўзбекистонга Тожикистон ва Қирғизистондан контрабанда йўли билан келтирилган қарийб 65 кило гашиш мусодара қилинди.
Сурхондарё вилояти Денов туманида яшовчи, 1994 йилда туғилган фуқаро Cobalt автомашинасида Узун тумани ҳудудида ҳаракатланаётган вақтида тўхтатилиб, кўздан кечирилганда, унинг юкхонасида 50 килограмм 567 грамм гашиш моддаси борлиги аниқланиб, просессуал тартибда расмийлаштирган. Терговга қадар текширув давомида у гиёҳвандлик воситасини тожикистонлик наркосавдогарлардан олгани аниқланган.
Фарғона вилоятида қайд этилган ҳолатда, Марғилон шаҳрида яшовчи, 1972 йилда туғилган фуқаро муқаддам тожикистонлик наркокурерлар томонидан Тошкент вилоятининг Бўка тумани ҳудудидаги хуфия жойга қолдириб кетилган 4 кило 929 грамм гашиш моддасини қабул қилиб олиб, йўловчи автомашинада доимий яшаш манзилига қайтиб келаётган вақтида ДХХ ходимлари томонидан Фарғона шаҳрида қўлга олинган. Аниқланишича, у гиёҳвандлик воситасини қайта сотиб, мўмай даромад топишни мақсад қилган.
Андижон вилоятида ўтказилган тезкор тадбирда Самарқанд—Андижон йўналишида ҳаракатланаётган Spark Бўстон туманидаги ЙПХ масканида тўхтатилиб, текширилганда, унда кетаётган Қўрғонтепа туманида истиқомат қилувчи, 1990 ва 1995 йилларда туғилган уч киши ҳамда Қирғизистоннинг Ўш вилояти Қора-суу шаҳрида яшовчи, 1984 йилда туғилган ушбу давлат фуқаросидан 4 кило 727 грамм гашиш моддаси олинган.
Аниқланишича, улар мазкур гиёҳвандлик воситасини тожикистонлик шахсдан Ургут туманига келтириб бериш шарти билан сотиб олган ва уни қолдириб кетилган хуфия жойдан олиб, ортга қайтаётган бўлган.
Бошқа ҳолатда эса Пахтаобод туманида яшовчи, 1981, 1982, 1991, 1992 йилларда туғилган 4 нафар фуқаро Қирғизистондаги наркосавдогарлар етказиб берган 4 кило 634 грамм гашишни Андижон туманида 53 минг долларга сотган вақтларида ашёвий далиллар билан ушланган.
Улардан 3 нафари муқаддам судланган шахслар ҳисобланади.
Ҳозирда мазкур шахсларга нисбатан жиноят ишлари қўзғатилиб, қамоқ эҳтиёт чораси қўлланилган. Тергов ҳаракатлари олиб борилмоқда.
Октябрь ойида Ўзбекистонга Афғонистон, Тожикистон ва Қирғизистондан келтирилган 47 килодан ортиқ наркотик моддалар мусодара қилинганди. Тошкент шаҳрида яшовчи икки фуқаро тожикистонлик наркокурерлар томонидан айланма йўллар орқали олиб келиниб, Қуйи Чирчиқ туманидаги хуфия жойга қолдириб кетилган гашишни қабул қилиб олган вақтида ушланганди.
Изоҳ (0)