1 июлдан бошлаб Россияда чет элликларга ҳужжатларни расмийлаштириш учун бир қатор божлар нархи ошди. Меҳнат низоларини ҳал қилишда ёрдам маркази (СТС) бу ва бошқа янгиликлар бўйича материал эълон қилди.
Россия Меҳнат ва ижтимоий муҳофаза вазирлиги 2025 йил учун мамлакатнинг 11 та субъектида чет эллик ишчиларнинг улушини камайтириш тўғрисида қарор лойиҳасини ишлаб чиқди. Бу ҳақдаги ҳужжат 2024 йил 21 июнь куни норматив-ҳуқуқий ҳужжатлар лойиҳаларининг расмий порталида эълон қилинди. Таъкидланишича, қарор минтақаларнинг таклифларини ҳисобга олган ҳолда тайёрланган.
Унга кўра, Красноярск ўлкасида меҳнат муҳожирларининг сабзавот етиштириш соҳасидаги иштироки тўлиқ чекланади. Йўловчилар ва юк ташиш каби соҳаларда чет эл меҳнат кучининг улуши ишчиларнинг умумий сонининг 20 фоизигача камаяди. Спорт соҳасидаги компаниялар чет элликларнинг атиги 15 фоизини ишга олишлари мумкин.
Доғистонда чет эллик ишчиларни қурилишда 30 фоизгача (бошқа субъектларда — 80 фоиз даражасида), Краснодар ўлкасида — қишлоқ ва ўрмон хўжалиги ва қайта ишлаш саноатида — 50 фоизгача, транспорт, меҳмонхона ва ресторан бизнесида — 15 фоизгача чеклаш жорий этилган, Калуга вилоятида чет эллик ишчиларнинг иши болалар овқатлари ишлаб чиқаришда, Оренбургда алкоголли ичимликлар чакана савдосида ва енгил такси фаолиятида бутунлай чекланган.
Хорижий ишчи кучидан фойдаланиш чекловлари Челябинск, Магадан, Рязань, Самара, Амур вилоятлари ва Удмуртия Республикасига ҳам таъсир қилади.
Чет эллик ишчилар учун илова
Россия Федерацияси Рақамлаштириш вазирлиги раҳбарининг ўринбосари Олег Качанов муҳожирлар учун мобил илова ва у билан боғлиқ ижтимоий хизматларни ривожлантириш ҳақида гапириб ўтди.
“Биз фойдаланиш қулайлигини таъминлашимиз керак. Фақат қоғоз билан уч соат навбатда туриш учун эмас, балки чет эл фуқаролари учун маълум хизматлар тўплами бўйича қулайликлар яратишимиз керак”, деди у.
Иловада электрон миграция картасидан фойдаланиш, яшаш жойида рўйхатдан ўтиш, меҳнат шартномаларини тузиш, уяли алоқа хизматларини кўрсатиш учун шартномалар тузиш ва ҳоказо ишларни қилиш мумкин бўлади.
Хизматларнинг нархи
Россияда жорий йилнинг 1 июлидан бошлаб бир қатор хизматлар учун давлат божлари ошди: яшаш учун рухсатнома (ВНЖ), вақтинча яшаш учун рухсатнома (РВП), яшаш жойида рўйхатдан ўтиш (прописка), шунингдек, чет эллик ишчиларни жалб қилиш ва улардан фойдаланиш учун рухсатнома бериш, ишлаш учун рухсатнома бериш, Россия федерацияси фуқаролигига қабул қилиш, чет эл фуқароларига ёки фуқаролиги бўлмаган шахсларга Россия федерациясига кириш учун таклифномалар ва ҳоказо.
Рақамлар бўйича фарқни “Российская газета” ҳисоблаб чиқди. 14 ёшгача бўлган болага паспорт олиш учун 1 июлдан бошлаб бож 3000 рублни ташкил этади, бу илгари белгиланган нархдан 500 рубль кўпроқ. Катталарга янги авлод паспортини олиш учун тўлов 1 минг рублга ошиб, 6000 рублни ташкил қилди.
Яшаш учун рухсатнома ҳам минг рублга кўтарилиб, 6000 рубль бўлди. Чет эл фуқаросини ёки фуқаролиги бўлмаган шахсни яшаш жойида рўйхатдан ўтказиш учун 420 рубль тўлаш керак, нарх 70 рублга ошди.
Энг муҳими, чет эллик ишчиларни жалб қилиш ва уларни ишидан фойдаланиш учун рухсатнома нархи ошди — 12000 рубль, бу аввалгидан 2000 рубль кўпроқ. Чет эллик ходимларнинг ўзлари эса ишлаш учун рухсатнома олишга 3500 рубль ўрнига 4200 рубль тўлайдилар.
Худди шундай тартибда Россия фуқаролигини олиш божи ҳам кўпаяди.
Рус тили бўйича тест топшириш жараёни назорати кучайтирилади
“Рособрнадзор” мигрантлар учун рус тилидаги имтиҳонлар устидан назоратни кучайтиришни режалаштирмоқда: нутқ ва ёзма топшириқларни бажариш, минимал ўтиш балини ошириш, барча имтиҳонларни видеога ёзиб олиш мажбурийдир. Бу ҳақда агентлик раҳбари Анзор Музаев Петербург халқаро юридик форумида маълум қилди.
“Тил тўсиғи Россияга ишлаш учун келган бошқа мамлакатлар фуқаролари учун муаммо туғдиради, масалан, меҳнат низоларида ўз ҳуқуқларини ҳимоя қилишлари керак бўлган ҳолларда муаммо ҳисобланади. Бизнинг марказимиз Қирғизистон, Ўзбекистон, тожикистонлик мигрантларга меҳнат низоларини ўз она тилида ҳам, рус тилида ҳам ҳал қилишда бепул юридик ёрдам кўрсатмоқда”, деди СТС раҳбари Константин Смуригин.
Шунингдек, у консултацияни ижтимоий тармоқлар ва мессенжерлар орқали, телефон орқали, сайтдаги ариза шакли орқали олиш мумкинлигини айтиб ўтди.
Изоҳ (0)