Россия Федерал хавфсизлик хизмати Crocus City Hall’га ҳужум қилишда гумон қилинган Тожикистон фуқароларининг сўроқ қилиниши тасвирланган лавҳаларни намойиш қилди. Бу ҳақда “РБК” хабар берди.
Айбланувчилар Сайфулло исмли шахснинг кўрсатмаларига амал қилганликлари ва у Украина чегарасини пиёда кесиб ўтишни таъкидлаганини айтди. Биринчи бўлиб Далержон Мирзоев сўроқ қилинган. У терактдан кейин қандай режалари бўлгани ҳақидаги саволга “Киев томон” деб жавоб берган.
“Сайфулло бизга Украинага, Киевга боришни, у ерда бир миллион рубль беришларини айтди”, — дейди Саидакрами Рачабализода.
“Тегишли миқдор тўрт кишининг ҳар бирига ваъда қилинган”, — дейди Муҳаммадсобир Файзов. У Сайфулло берган ваъдасига асосланиб, Украина чегарасидан ўтишда уларга одамлар ёрдам бериши керак бўлганини билдирди.
Россия махсус хизматларига кўра, чегарадан ўтиш бўйича иккита коридор тайёрланган.
“Украина томонида Суми вилоятининг Чуйковка ва Сопич қишлоқлари яқинида миналардан тозалаш ишлари олиб борилган”, — деб хабар берди “Первий канал”.
Ҳибсга олинганларнинг сўзларига кўра, улар чегарага 4 километр қолганда машинани ёқиб, Сайфуллонинг кўрсатмаси бўйича пиёда юришлари керак эди.
Crocus’даги теракт
Москва вилояти Crocus City Hall’даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 143 киши ҳалок бўлган, юзлаб одамлар жароҳатланган. Ҳужумни содир этишда Тожикистоннинг тўрт нафар фуқароси айбланган, суд улар айбига иқрор бўлганини маълум қилган.
Мазкур ҳолатдан кейин Россияда мигрантларга нисбатан муносабат ўзгарган. Тожикистон президенти ҳужумни “шармандали ва даҳшатли воқеа” деб атаган ҳамда ота-оналарни фарзандлари тарбиясига жиддийроқ эътибор қаратишга чақирган.
Ўз навбатида, Россия терговчилари теракт иштирокчиларининг оиласини сўроқ қилиш учун Тожикистонга борган. Шундан кейин Ваҳдат шаҳрида яшовчи тўққиз нафар тожикистонлик Crocus’даги теракт ижрочилари билан алоқадорликда айбланиб, қўлга олинган. Ҳибсга олинганлар ИШИД билан алоқада бўлганликда ҳам гумон қилинмоқда.
Доғистонда ҳам аксилтеррор операция ўтказилиб, тўрт нафар Тожикистон фуқароси ушланган. Улар терактнинг асосий иштирокчиларини қурол ва пул билан таъминлагани айтилмоқда. Россия Ташқи ишлар вазирлиги Украина ҳукуматини расман Crocus City Hall’даги терактда айблаган. Украина расман мазкур айбловларни рад этган. Ўз навбатида, ИШИДнинг Афғонистондаги бўлими “Вилояти Хуросон” ушбу ҳужум учун жавобгарликни ўз зиммасига олишини бир неча бор таъкидлаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)