Москва ва Бутун Рус Патриархи Кирилл тожикистонликларга мурожаат қилиб, уларни Россия дини ва маданиятини ҳурмат қилишга чақирди.
Россия Тожикистоннинг кўплаб аҳолисига ўз эшикларини очиб, улардан рус маданияти ва православлигига сўзсиз ҳурматни кутади, бу ҳурмат ҳамиша рус православ черковининг Тожикистон заминида мавжудлигига асос бўлиб келган, — деди у.
Патриарх рус православ черкови ва мусулмон жамоатчилигининг ўзаро ҳамкорлиги ҳозирда икки давлат ўртасида “нифоқ солишга уринишлар бўлаётгани” сабабли аҳамиятли эканини айтди. Руҳонийнинг фикрича, бу диний шиорлар ниқоби остида содир бўлмоқда.
У диний етакчиларни террорчиларни сўзсиз қоралашга чақирди ва эътиқоддан қурол сифатида фойдаланишга йўл қўймаслик кераклигини таъкидлади.
Crocus’даги теракт
Москва вилояти Crocus City Hall’даги теракт 22 март куни кечқурун содир бўлди. Бир неча қуролланган шахслар концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 143 киши ҳалок бўлган, юзлаб одамлар жароҳатланган. Ҳужумни содир этишда Тожикистоннинг тўрт нафар фуқароси айбланган, суд улар айбига иқрор бўлганини маълум қилган.
Мазкур ҳолатдан кейин Россияда мигрантларга нисбатан муносабат ўзгарган. Тожикистон президенти ҳужумни “шармандали ва даҳшатли воқеа” деб атаган ҳамда ота-оналарни фарзандлари тарбиясига жиддийроқ эътибор қаратишга чақирган.
Ўз навбатида, Россия терговчилари теракт иштирокчиларининг оиласини сўроқ қилиш учун Тожикистонга борган. Шундан кейин Ваҳдат шаҳрида яшовчи тўққиз нафар тожикистонлик Crocus’даги теракт ижрочилари билан алоқадорликда айбланиб, қўлга олинган. Ҳибсга олинганлар ИШИД билан алоқада бўлганликда ҳам гумон қилинмоқда.
Доғистонда ҳам аксилтеррор операция ўтказилиб, тўрт нафар Тожикистон фуқароси ушланган. Улар терактнинг асосий иштирокчиларини қурол ва пул билан таъминлагани айтилмоқда. Россия Ташқи ишлар вазирлиги Украина ҳукуматини расман Crocus City Hall’даги терактда айблаган. Украина расман мазкур айбловларни рад этган. Ўз навбатида, ИШИДнинг Афғонистондаги бўлими “Вилояти Хуросон” ушбу ҳужум учун жавобгарликни ўз зиммасига олишини бир неча бор таъкидлаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)