“Қирмизи олма”, “Лайлойимсан”, “Соғиниб” каби ҳит қўшиқлари билан танилган хонанда Улуғбек Раҳматуллаев “Халқлар дўстлиги” санъат саройида “Унутилмас ноябрь” номли етти кунлик концерт дастурини тақдим этмоқда.
Ижодий фаолиятига 24 йил тўлган ижодкор бу йилги концертида ҳам барча севган машҳур тароналари билан бирга инсонни ўйга толдирувчи, юки бор қўшиқлар ҳам куйлайдими? Қачон тўлиқ жонли ижрода концерт беради? “Дарё” мухбири хонанданинг ўзидан бу саволларга жавоб олди.
Концертда жами 19 та қўшиқ куйланиб, улардан олтитаси премьера бўлди. Мухлислари билан дийдорни соғингани хонанданинг ҳар бир чиқишида сезилди.
“Мен сарҳисоб учун концерт бермайман, мухлисларимни соғинганим учун улар билан дийдор кўришишни хоҳлайман, — дейди Улуғбек Раҳматуллаев. — Чунки сўнгги йилларда икки йилда бир марта концерт беряпман: бир йил Ўзбекистонда берсам, келаси йил чет давлатда. Тўй-ҳашам ўз йўлига, мен ўзимни саҳна одами деб ҳисоблайман. Мухлисларим билан дилдан суҳбатлашаман, уларга нима ёқади-ю, нима ёқмайди, биламан. Узоқ вақтдан бери тайёрланишимга сабаб масъулиятни катта оламан. Концерт кунигача миямдан минг хил хаёл ўтади. Шукр, мухлисларимга концерт ёқиб келяпти, муҳими шу. Бошқа концертларимдан бу йилгисининг фарқи — жиддий, оғир-босиқликда ўтяпти, улғайяпмиз”.
Хонанданинг концертида яхши анъана бор — инсонни ўйлантирувчи, тафаккур қилишга ундайдиган бир мавзу танлаб, шунга бағишлаб қўшиқ куйлайди. Аввалги концертдаги мавзу — қариялар уйи, воз кечилган ота-оналар бўлганди. Хўш, бу йил ижодкор қайси мавзуни танлади?
— Бу йил кўп мавзуларни ўйладим ва қиёматли дўст ҳақида куйлашга қарор қилдим. Бундан ташқари, “Аёлингни сев” номли янги қўшиқ бор. Тирик ота-оналар ҳақида куйларканман-у, лекин ҳамманинг ҳам падари ва волидаси ҳаёт эмас. Улар учун ҳам “Соғиндим, отам” номли жуда таъсирли қўшиқ тайёрлаганман. Охири жуда ғамгин қўшиқлар кўпайиб кетмадимикин, деб ҳам ўйлаб қолдим. Лекин мухлислар жуда яхши қабул қиляпти. Менинг концертимда куламиз, йиғлаймиз, хулоса чиқарамиз. Бошқа санъаткорлар хафа бўлмасин-у, ҳеч кимнинг мухлислари меникичалик эмас!, дейди ижодкор.
Концерт рэпертуари борасида мухлисларда икки хил фикр бор: айримлар концертга келган мухлислар янги қўшиқларни биринчи бўлиб эшитишга ҳақли деса, бошқалар севимли хонандаси билан “олтин ҳит”ларни жўр бўлиб куйлашни хоҳлайди. Улуғбек Раҳматуллаевнинг бу йилги концертида қайси бири устунроқ?
— Ўзимни ҳам энг қийнайдиган масала бу — рэпертуар танлаш. Сабаби концертга келадиган мухлислар 7 дан 70 ёшгача, ёш йигит-қизлар ҳам, отахон-у онахонлар ҳам бор. Ҳамманинг кўнглини бирдек олишга ҳаракат қиламан, барибир. Бу тарафлама дўстларим, яқинларим ёрдам беради, деди хонанда.
Сўнгги йилларда кўп эстрада хонандалари жонли ижродаги концерт беряпти. Айримларида тўлиқ, айримларида 40—50 фоиз жонли ижро бўляпти-ю, лекин энг муҳими бор. Хонандага жонли ижрода концерт бериш фикри келдими ҳеч деган саволга санъаткор қуйидагича жавоб берди:
— Юз фоиз жонли ижрода куйлаш орзум, албатта. Лекин бунга тўсқинлик қилувчи соғлиқ билан боғлиқ баъзи бир ҳолатлар бор. Тўғри, бу ҳам бир баҳона бўлиши мумкин, лекин насиб қилса, келаси йил ижодимнинг 25 йиллигида тўлиқ жонли ижрода концерт беришни ният қилдим.
Концертда иккита дуэт бўлиб, бири Умидахон билан бўлса, иккинчиси тожикистонлик ёш хонанда билан. Икки премьера дуэт ҳам мухлисларга манзур келди. Қизиқчи Аваз Охун эса ўз ҳазиллари билан концертга келганларнинг кайфиятини икки баробарга ошириб юборди.
Улуғбек Раҳматуллаев концертга келган мухлисларидан бирига умра сафарига йўлланма берди. Насибахон она қувонч кўз ёшларини тиёлмади ва севимли хонандасини узоқ дуо қилди.
Изоҳ (0)