Россия Мудофаа вазирлиги 3 апрель куни эълон қилган ҳисоботда жорий йил бошидан бери урушда қатнашишни истаган 100 000 дан ортиқ киши шартнома асосида армия рўйхатига олингани айтилди. Бу ҳақда “ТАСС” нашри батафсил хабар берди.
Манбага кўра, 2024 йилнинг атиги уч ойи давомида жами 100 мингга яқин фуқаро рўйхатга олинган. Сафарбарликка олиш марказларида жараёнлар фаоллашган.
Россия мудофаа вазирлиги жорий йил давомида жами 400 минг аскар армияга жалб қилиниши ҳақида хабар берган. Фронтдаги вазият ўзгаришига қараб, чақириладиганлар сони ҳам ўзгариши мумкин.
Олдинроқ Россия ҳукумати Crocus City Hall’га ҳужум ортидан армияга кетишни истайдиганлар сони кескин ошганини маълум қилган эди. Мудофаа вазирлигига кўра, сўнгги 10 кун ичида 16 мингга яқин одам урушда қатнашиш учун шартнома имзолаган. Ҳар куни мамлакат бўйлаб 1700 нафаргача одам ҳарбий хизматга ёлланиш учун саралаш пунктларига келмоқда.
Crocus’даги теракт
Москва вилояти Crocus City Hall’даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 143 киши ҳалок бўлган, юзлаб одамлар жароҳатланган. Ҳужумни содир этишда Тожикистоннинг тўрт нафар фуқароси айбланган, суд улар айбига иқрор бўлганини маълум қилган.
Мазкур ҳолатдан кейин Россияда мигрантларга нисбатан муносабат ўзгарган. Тожикистон президенти ҳужумни “шармандали ва даҳшатли воқеа” деб атаган ҳамда ота-оналарни фарзандлари тарбиясига жиддийроқ эътибор қаратишга чақирган.
Ўз навбатида, Россия терговчилари теракт иштирокчиларининг оиласини сўроқ қилиш учун Тожикистонга борган. Шундан кейин Ваҳдат шаҳрида яшовчи тўққиз нафар тожикистонлик Crocus’даги теракт ижрочилари билан алоқадорликда айбланиб, қўлга олинган. Ҳибсга олинганлар ИШИД билан алоқада бўлганликда ҳам гумон қилинмоқда.
Доғистонда ҳам аксилтеррор операция ўтказилиб, тўрт нафар Тожикистон фуқароси ушланган. Улар терактнинг асосий иштирокчиларини қурол ва пул билан таъминлагани айтилмоқда. Россия Ташқи ишлар вазирлиги Украина ҳукуматини расман Crocus City Hall’даги терактда айблаган. Украина расман мазкур айбловларни рад этган. Ўз навбатида, ИШИДнинг Афғонистондаги бўлими “Вилояти Хуросон” ушбу ҳужум учун жавобгарликни ўз зиммасига олишини бир неча бор таъкидлаган.
Изоҳ (0)