Crocus’даги терактдан кейин урушга боришни хоҳловчилар сони ортди — Россия Мудофаа вазирлиги

Россия Мудофаа вазирлиги Crocus’даги терактдан кейин мамлакатда шартнома бўйича ҳарбий хизмат ўташни хоҳловчилар сони сезиларли даражада ошганини маълум қилди.

Мудофаа вазирлигига кўра, сўнгги 10 кун ичида 16 мингга яқин одам урушда қатнашиш учун шартнома имзолаган. Ҳар куни мамлакат бўйлаб 1700 нафаргача одам ҳарбий хизматга ёлланиш учун саралаш пунктларига келади.

“Ўтган ҳафта давомида Россия шаҳарларидаги саралаш пунктларида ўтказилган суҳбатлар чоғида номзодларнинг аксарияти шартнома тузишнинг асосий сабаби сифатида 2024 йил 22 март куни Москва вилоятида содир бўлган фожиада ҳалок бўлганлар учун қасос олиш истагини кўрсатди”, — дейди вазирлик. 

Crocus’даги теракт

Москва вилояти Crocus City Hall’даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 143 киши ҳалок бўлган, юзлаб одамлар жароҳатланган. Ҳужумни содир этишда Тожикистоннинг тўрт нафар фуқароси айбланган, суд улар айбига иқрор бўлганини маълум қилган.

Мазкур ҳолатдан кейин Россияда мигрантларга нисбатан муносабат ўзгарган. Тожикистон президенти ҳужумни “шармандали ва даҳшатли воқеа” деб атаган ҳамда ота-оналарни фарзандлари тарбиясига жиддийроқ эътибор қаратишга чақирган.

Ўз навбатида, Россия терговчилари теракт иштирокчиларининг оиласини сўроқ қилиш учун Тожикистонга борган. Шундан кейин Ваҳдат шаҳрида яшовчи тўққиз нафар тожикистонлик Crocusъдаги теракт ижрочилари билан алоқадорликда айбланиб, қўлга олинган. Ҳибсга олинганлар ИШИД билан алоқада бўлганликда ҳам гумон қилинмоқда.

Доғистонда ҳам аксилтеррор операция ўтказилиб, тўрт нафар Тожикистон фуқароси ушланган. Улар терактнинг асосий иштирокчиларини қурол ва пул билан таъминлагани айтилмоқда. Россия Ташқи ишлар вазирлиги Украина ҳукуматини расман Crocus City Hall’даги терактда айблаган. Украина расман мазкур айбловларни рад этган. Ўз навбатида, ИШИДнинг Афғонистондаги бўлими “Вилояти Хуросон” ушбу ҳужум учун жавобгарликни ўз зиммасига олишини бир неча бор таъкидлаган.