Исроил ҲАМАС етакчиси Яҳё Синварнинг жасадини Ғазода ўт очишни тўхтатиш ва гаровга олинганларни озод қилиш бўйича келишув доирасида қайтаришни режалаштирмаяпти. Бу ҳақда Исроилнинг Ynet портали хабар берди.
Аввалроқ Ал-Арабия телеканали Фаластин томони келишувнинг биринчи босқичи доирасида Синварнинг жасадини топширишни талаб қилаётгани ҳақида маълумот тарқатганди. 13 январь куни Доҳадаги маслаҳатлашувлардан сўнг Қатар Исроил ва ҲАМАСга оташкесим бўйича келишувнинг якуний лойиҳасини берган.
У фаластинлик маҳбуслар эвазига гаровдагиларни озод қилиш, ўт очишни тўхтатиш, шунингдек, анклавни бошқаришнинг янги тизимини муҳокама қилиш билан боғлиқ уч босқичли келишувни назарда тутади. Битим АҚШ президенти этиб сайланган Дональд Трампнинг инаугурациясидан олдин имзоланиши кутилмоқда.
ҲАМАС битимнинг якуний лойиҳасига эътироз билдирмагани айтилган. Иккала томон ҳам гаровдагилар ва маҳбусларни айирбошлашга тайёргарлик кўрмоқда.
Яҳё Синвар 2017 йилдан буён Ғазо секторида ҲАМАСни бошқарган. У гуруҳнинг Исроил Ғазога бостириб киришига мудофаавий жавобини бошқарган ва ўт очишни тўхтатиш бўйича музокараларда қатнашган. Синвар 2024 йилнинг июль ойида ҲАМАС сиёсий етакчиси Исмоил Ҳания ва Ғазода юқори даражали қўмондон Муҳаммад Деиф ўлдирилганидан сўнг ҲАМАСга раҳбарлик қилди. У 2024 йил 16 октябрь куни Исроил операцияси оқибатида вафот этди.
Исроил Синварни 2023 йил 7 октябрда 1139 кишининг ўлими ва 250 га яқин киши гаровга олинган ҲАМАС операциясини режалаштирганликда айблайди. Исроилнинг Ғазо секторидаги ҳарбий амалиётлари оқибатида 46 мингдан ортиқ киши ҳалок бўлди ва инфратузилма кенг миқёсда вайрон бўлди.
Изоҳ (0)