Фаластиннинг ҲАМАС ҳаракатининг Ғазодаги ташқи алоқалар бўлими раҳбари Бассем Наим ҲАМАС етакчиси Яҳё Синварнинг ўлимини тасдиқлади, деб хабар бермоқда Associated Press.
“Ҳа, яқинларимизни, айниқса етакчи Яҳё Синварни йўқотиш жуда оғриқли ва ачинарли, аммо биз охир-оқибат ғалаба қозонишимизга ишончимиз комил”, дейди у.
Унинг сўзларига кўра, Исроил Синварнинг ўлими ҲАМАСга барҳам беради, деб ҳисобласа-да, аслида гуруҳ янада “кучлироқ бўлади”.
Аввалроқ Холид Машъал Синвар ўлимидан сўнг ҲАМАС ҳаракати раҳбари вазифасини бажараётгани хабар берилган эди. LBCI телеканали манбаларига кўра, энди Машъал Ғазодаги сулҳ бўйича музокараларда иштирок этаётган асосий томонлар билан барча алоқалар учун жавобгардир.
Шунингдек, манбалар “ҲАМАС раҳбарияти Турк, Қатар ва Миср расмийларини Тел ал-Султондаги операция чоғида унинг сиёсий бюроси раҳбари Яҳё Синварнинг ўлими ҳақида хабардор қилгани”ни тасдиқлаган.
Оқ уйнинг хабар беришича, АҚШ президенти Жо Байден Исроил бош вазири Бенямин Нетаньяхуни Синварнинг тугатилгани билан табриклаган ва сиёсатчилар Ғазо бўйича музокараларни қайта бошлаш имкониятларини муҳокама қилган. Ўз навбатида, Нетаньяху ёрдамчиси ва яна бир исроиллик амалдор Axios’га Синварнинг йўқ қилиниши Ғазода ўт очишни тўхтатиш эвазига гаровга олинганларни озод қилиш бўйича битим тузиш истиқболларини очиб беришини маълум қилган.
Изоҳ (0)