Яҳё Синвар ҲАМАС сиёсий бюроси раҳбари этиб тайинлангач, Исроил ТИВ раҳбари Исроил Кац уни тезроқ йўқ қилишга чақирди.
“Исмоил Ҳания ўрнига Яҳё Синвар ҲАМАСнинг янги раҳбари этиб тайинланиши уни тезроқ йўқ қилиш ва бу ёвуз ташкилотни ер юзидан ўчириб ташлаш учун яна бир яхши сабабдир”, деб ёзди у Х ижтимоий тармоғида.
61 ёшли Яҳё Синвар Фаластин ҲАМАС ҳаракатининг янги сиёсий раҳбари этиб тайинланган эди. Синварнинг ҲАМАС раҳбари этиб сайлангани Исмоил Ҳания Теҳронда ўлдирилганидан бир ҳафта ўтиб эълон қилинди. Синвар гуруҳнинг энг кўп қидирилаётган етакчилари рўйхатида. Гуруҳнинг Исроилга ҳужумидан сўнг у омма олдида кўриниш бермаган ва Ғазодаги ерости туннелларида яширинган деб тахмин қилинган.
Синвардан аввалги ҲАМАС раҳбари Исмоил Ҳания 31 июль куни Теҳронда ўлдирилган эди. ҲАМАС ва Эрон қотилликда Исроилни айблаган. Эрон олий раҳнамоси Оятуллоҳ Хоманаий Исроилни жазолашга чақирган. Исроилнинг ўзи Ҳаниянинг ўлдирилишига изоҳ бермаган.
Ҳания ўлдирилишидан бир неча соат аввал Исроил Ливандаги “Ҳизбуллоҳ” ҳаракати қўмондонларидан бири Фуад Шукрни йўқ қилган. “Ҳизбуллоҳ” етакчиси Ҳасан Насруллоҳ ҳам Исроилга жавоб зарбалари беришга чақирган.
Халқаро ҳамжамият минтақадаги инқирозни юмшатиш учун ҳаракат қилмоқда. АҚШ Давлат котиби Энтони Блинкенга кўра, АҚШ кескинликни юмшатиш учун “кеча-ю кундуз ишламоқда”. Аввалроқ у Эрон ва Исроилни можаронинг авж олишидан қочишга чақирган.
“Кейинги зарбалар ҳеч ким башорат қила олмайдиган ёки тўлиқ назорат қила олмайдиган хавфли оқибатлар эҳтимолини оширади”, дея огоҳлантирган Блинкен.
Изоҳ (0)