АҚШ давлат котиби Энтони Блинкен Яқин Шарқ бўйлаб сафари доирасида Исроилга келди, деб хабар бермоқда AFP.
Блинкен Исроил бош вазири Биньямин Нетаньяху билан учрашади. Давлат котиби Ғазо секторидаги урушни тугатиш ва гаровга олинганларни озод қилиш, шунингдек, Ливандаги можарони ҳал қилиш бўйича музокараларни қайта бошлаши кутилмоқда.
Энтони Блинкеннинг сафари 21-25 октябрь кунлари давом этади, дея хабар беради АҚШ Давлат департаменти. Америка Қўшма Штатлари бу галги сафар Ғазода ўт очишни тўхтатиш бўйича музокараларни олға силжитишга ёрдам беришига ишонади, деди брифингда Давлат департаменти матбуот хизмати раҳбари ўринбосари Ведант Пател. Унга кўра, Энтони Блинкен Исроил ва бошқа Яқин Шарқ давлатларида “ҳамкорлар билан жуда муҳим музокаралар” ўтказади.
АҚШ Давлат департаменти аввалроқ ўт очишни тўхтатиш бўйича келишувга эришишга ҲАМАС ҳаракати Сиёсий бюроси раҳбари Яҳё Синвар тўсқинлик қилганини айтмоқда. У 17 октябрь куни Исроил ҳарбийлари томонидан ўлдирилган.
18 октябрь куни ҲАМАС ўз етакчисининг ўлимини тасдиқлади, бироқ ҳаракат қуролларини ташлаб, таслим бўлишдан бош тортди. ҲАМАС Ғазодаги жанговар ҳаракатлар тугамагунча ва барча ҳарбий хизматчилар ҳудуддан тўлиқ олиб чиқилмагунча гаровга олинган исроилликларни қайтармасликка ваъда берди. ОАВ ҲАМАС ҳануз Яҳё Синварнинг ўрнини ким эгаллашини яширишга уринаётганини ёзди.
Изоҳ (0)